Read Chichewa Buku Lopatulika Bible 2014 MASALIMO 84 Bible Online

MASALIMO 84 - Chichewa Buku Lopatulika Bible 2014 bible

MASALIMO 84

¹Kwa Mkulu wa Nyimbo; pa Gititi; Salimo la ana a Kora. Pokhala Inu mpotikonda ndithu, Yehova wa makamu!

²Moyo wanga ulakalaka, inde ukomokanso ndi kufuna mabwalo a Yehova; mtima wanga ndi thupi langa zifuulira kwa Mulungu wamoyo.

³Mbawanso inapeza nyumba, ndi namzeze chisa chake choikamo ana ake, pa maguwa a nsembe anu, Yehova wa makamu, mfumu yanga ndi Mulungu wanga.

⁴Odala iwo akugonera m'nyumba mwanu; akulemekezani chilemekezere.

⁵Wodala munthu amene mphamvu yake ili mwa Inu; mumtima mwake muli makwalala a ku Ziyoni.

⁶Popyola chigwa cha kulira misozi achiyesa cha akasupe; inde mvula ya chizimalupsa ichidzaza ndi madalitso.

⁷Apita mwamphamvu naonjezapo mphamvu, aoneka pamaso pa Mulungu m'Ziyoni.

⁸Yehova Mulungu wa makamu, imvani pemphero langa. Tcherani khutu, Mulungu wa Yakobo.

⁹Onani, Mulungu, ndinu chikopa chathu; ndipo penyani pa nkhope ya Wodzozedwa wanu.

¹⁰Pakuti tsiku limodzi m'mabwalo anu likoma koposa masiku ambirimbiri akukhala pena. Kukhala ine wapakhomo m'nyumba ya Mulungu wanga, kundikonda ine koposa kugonera m'mahema a choipa.

¹¹Pakuti Yehova Mulungu ndiye dzuwa ndi chikopa; Yehova adzapatsa chifundo ndi ulemerero; sadzakaniza chokoma iwo akuyenda angwiro.

¹²Yehova wa makamu, wodala munthu wakukhulupirira Inu.