Read Chichewa Buku Lopatulika Bible 2014 MASALIMO 88 Bible Online

MASALIMO 88 - Chichewa Buku Lopatulika Bible 2014 bible

MASALIMO 88

¹Nyimbo, Salimo la ana a Kora. Kwa Mkulu wa Nyimbo, pa Mahalati Leanoti. Chilangizo cha Hemani Mwezara. Yehova, Mulungu wa chipulumutso changa, ndinafuula pamaso panu usana ndi usiku.

²Pemphero langa lidze pamaso panu; munditcherere khutu kukuwa kwanga.

³Pakuti mzimu wanga wadzala nao mavuto, ndi moyo wanga wayandikira kumanda.

⁴Anandiwerenga pamodzi nao otsikira kudzenje; ndakhala ngati munthu wopanda mphamvu.

⁵Wotayika pakati pa akufa, ngati ophedwa akugona m'manda, amene simuwakumbukiranso; ndipo anawadula kusiyana ndi dzanja lanu.

⁶Munandiika kunsi kwa dzenje, kuli mdima, kozama.

⁷Mkwiyo wanu utsamira pa ine, ndipo munandizunza ine ndi mafunde anu onse.

⁸Munandisiyanitsira wodziwana nane kutali; munandiika ndiwakhalire chonyansa. Ananditsekereza, osakhoza kutuluka ine.

⁹Diso langa lapuwala chifukwa cha kuzunzika kwanga: Ndimaitana Inu, Yehova, tsiku lonse; nditambalitsira manja anga kwa Inu.

¹⁰Kodi mudzachitira akufa zodabwitsa? Kodi adzaukanso otisiyawo, ndi kukulemekezani?

¹¹Adzafotokozera chifundo chanu kumanda kodi, chikhulupiriko chanu kumalo a chionongeko?

¹²Zodabwitsa zanu zidadziwika mumdima kodi, ndi chilungamo chanu m'dziko la chiiwaliko?

¹³Koma ndinafuulira kwa Inu, Yehova, ndipo pemphero langa lifika kwa Inu mamawa.

¹⁴Yehova mutayiranji moyo wanga? Ndi kundibisira nkhope yanu?

¹⁵Wozunzika ine ndi wofuna kufa kuyambira ubwana wanga; posenza zoopsa zanu, ndithedwa nzeru.

¹⁶Kuzaza kwanu kwandimiza; zoopsa zanu zinandiononga.

¹⁷Zinandizungulira ngati madzi tsiku lonse; zinandizinga pamodzi.

¹⁸Munandichotsera kutali wondikonda ndi bwenzi langa, odziwana nane akhala kumdima.