Read Chichewa Buku Lopatulika Bible 2014 MASALIMO 9 Bible Online

MASALIMO 9 - Chichewa Buku Lopatulika Bible 2014 bible

MASALIMO 9

¹Kwa Mkulu wa Nyimbo; pa Muti-Labeni. Salimo la Davide. Ndidzayamika Yehova ndi mtima wanga wonse; ndidzawerengera zodabwitsa zanu zonse.

²Ndidzakondwerera ndi kusekera mwa Inu; ndidzaimbira dzina lanu, Wam'mwambamwamba Inu.

³Pobwerera m'mbuyo adani anga, akhumudwa naonongeka pankhope panu.

⁴Pakuti mwandiweruzira mlandu wanga; mwakhala pa mpando wachifumu, woweruza wolungama.

⁵Mwadzudzula amitundu, mwaononga woipayo, mwafafaniza dzina lao kunthawi yonka muyaya.

⁶Adaniwo atha psiti, apululuka nthawi zonse; ndipo midziyo mwaipasula, chikumbukiro chao pamodzi chatha.

⁷Koma Yehova akhala chikhalire, anakonzeratu mpando wachifumu wake kuti aweruze.

⁸Ndipo Iyeyu adzaweruza dziko lapansi m'chilungamo, nadzaweruza anthu molunjika.

⁹Ndipo Yehova adzakhala msanje kwa iye wokhalira mphanthi. Msanje m'nyengo za nsautso;

¹⁰ndipo iwo akudziwa dzina lanu adzakhulupirira Inu; pakuti, Inu Yehova, simunawasiya iwo akufuna Inu.

¹¹Imbirani zoyamika Yehova, wokhala ku Ziyoni; lalikirani mwa anthu ntchito zake.

¹²Pakuti Iye wofuna chamwazi awakumbukira; saiwala kulira kwa ozunzika.

¹³Ndichitireni chifundo, Yehova; penyani kuzunzika kwanga kumene andichitira ondidawo, inu wondinyamula kundichotsa kuzipata za imfa.

¹⁴Kuti ndibukitse lemekezo lanu lonse; pa bwalo la mwana wamkazi wa Ziyoni, ndidzakondwera nacho chipulumutso chanu.

¹⁵Amitundu anagwa m'mbuna imene anaikumba, lakodwa phazi lao muukonde anautcha.

¹⁶Anadziwika Yehova, anachita kuweruza, woipayo anakodwa ndi ntchito ya manja ake.

¹⁷Oipawo adzabwerera kumanda, inde amitundu onse akuiwala Mulungu.

¹⁸Pakuti sadzaiwalika nthawi zonse waumphawi, kapena chiyembekezo cha ozunzika sichidzaonongeka kosatha.

¹⁹Ukani, Yehova, asalimbike munthu; amitundu aweruzidwe pankhope panu.

²⁰Muwachititse mantha, Yehova; adziwe amitundu kuti ali anthu.