Read Chichewa Buku Lopatulika Bible 2014 MASALIMO 90 Bible Online

MASALIMO 90 - Chichewa Buku Lopatulika Bible 2014 bible

MASALIMO 90

¹Pemphero la Mose munthu wa Mulungu. Ambuye, Inu munatikhalira mokhalamo m'mibadwomibadwo.

²Asanabadwe mapiri, kapena musanalenge dziko lapansi, ndi lokhalamo anthu, inde, kuyambira nthawi yosayamba kufikira nthawi yosatha, Inu ndinu Mulungu.

³Mubweza munthu akhale fumbi; nimuti, Bwererani inu, ana a anthu.

⁴Pakuti pamaso panu zaka zikwi zikhala ngati dzulo, litapita, ndi monga ulonda wa usiku.

⁵Muwatenga ngati ndi madzi aakulu, akhala ngati tulo; mamawa akhala ngati msipu wophuka.

⁶Mamawa uphuka bwino; madzulo ausenga, nuuma.

⁷Pakuti tionongeka mu mkwiyo wanu; ndipo m'kuzaza kwanu tiopsedwa.

⁸Munaika mphulupulu zathu pamaso panu, ndi zoipa zathu zobisika pounikira nkhope yanu.

⁹Pakuti masiku athu onse apitirira m'ukali wanu; titsiriza moyo wathu ngati lingaliro.

¹⁰Masiku a zaka zathu ndiwo zaka makumi asanu ndi awiri, kapena tikakhala nayo mphamvudi zaka makumi asanu ndi atatu; koma teronso kukula kwao kumati chivuto ndi chopanda pake; pakuti kumapitako msanga ndipo tithawa ife tomwe.

¹¹Adziwa mphamvu ya mkwiyo wanu ndani, ndi ukali wanu monga ayenera kukuopani?

¹²Mutidziwitse kuwerenga masiku athu motero, kuti tikhale nao mtima wanzeru.

¹³Bwerani, Yehova; kufikira liti? Ndipo alekeni atumiki anu.

¹⁴Mutikhutitse nacho chifundo chanu m'mawa; ndipo tidzafuula mokondwera ndi kukondwera masiku athu onse.

¹⁵Tikondweretseni monga mwa masiku mudatizunzawa, ndi zaka tidaona choipa.

¹⁶Chochita Inu chioneke kwa atumiki anu, ndi ulemerero wanu pa ana ao.

¹⁷Ndipo chisomo chake cha Yehova Mulungu wathu chikhalire pa ife; ndipo mutikhazikitsire ife ntchito ya manja athu; inde, ntchito ya manja athu muikhazikitse.