Read Chichewa Buku Lopatulika Bible 2014 MASALIMO 92 Bible Online

MASALIMO 92 - Chichewa Buku Lopatulika Bible 2014 bible

MASALIMO 92

¹Salimo, Nyimbo ya pa Sabata. Nkokoma kuyamika Yehova, ndi kuimbira nyimbo dzina lanu, Wam'mwambamwamba Inu.

²Kuonetsera chifundo chanu mamawa, ndi chikhulupiriko chanu usiku uliwonse.

³Pa choimbira cha zingwe khumi ndi pachisakasa; pazeze ndi kulira kwake.

⁴Popeza Inu, Yehova, munandikondweretsa ndi kuchita kwanu, ndidzafuula mokondwera pa ntchito ya manja anu.

⁵Ha! Ntchito zanu nzazikulu, Yehova, zolingalira zanu nzozama ndithu.

⁶Munthu wopulukira sachidziwa; ndi munthu wopusa sachizindikira ichi;

⁷chakuti pophuka oipa ngati msipu, ndi popindula ochita zopanda pake; chitero kuti adzaonongeke kosatha.

⁸Koma Inu, Yehova, muli m'mwamba kunthawi yonse.

⁹Pakuti, taonani, adani anu, Yehova, pakuti, taonani, adani anu adzatayika; ochita zopanda pake onse adzamwazika.

¹⁰Koma munakweza nyanga yanga ngati ya njati; anandidzoza mafuta atsopano.

¹¹Diso langa lapenya chokhumba ine pa iwo ondilalira, m'makutu mwanga ndamva chokhumba ine pa iwo akuchita zoipa akundiukira.

¹²Wolungama adzaphuka ngati mgwalangwa; adzakula ngati mkungudza wa ku Lebanoni.

¹³Iwo ookedwa m'nyumba ya Yehova, adzaphuka m'mabwalo a Mulungu wathu.

¹⁴Atakalamba adzapatsanso zipatso; adzadzazidwa ndi madzi nadzakhala abiriwiri,

¹⁵kulalikira kuti Yehova ngwolunjika; Iye ndiye thanthwe langa, ndipo mwa Iye mulibe chosalungama.