Read Chichewa Buku Lopatulika Bible 2014 MASALIMO 94 Bible Online

MASALIMO 94 - Chichewa Buku Lopatulika Bible 2014 bible

MASALIMO 94

¹Mulungu wakubwezera chilango, Yehova, Mulungu wakubwezera chilango, muoneke wowala.

²Nyamukani, Inu woweruza wa dziko lapansi: Bwezerani odzikuza choyenera iwo.

³Oipa adzatumpha ndi chimwemwe kufikira liti, Yehova? Oipa adzatero kufikira liti?

⁴Anena mau, alankhula zowawa; adzitamandira onse ochita zopanda pake.

⁵Aphwanya anthu anu, Yehova, nazunza cholandira chanu.

⁶Amapha wamasiye ndi mlendo, nawapha ana amasiye.

⁷Ndipo amati, Yehova sachipenya, ndi Mulungu wa Yakobo sachisamalira.

⁸Zindikirani, opulukira inu mwa anthu; ndipo opusa inu, mudzachita mwanzeru liti?

⁹Kodi Iye wakupanga khutu ngwosamva? Kodi Iye wakuumba diso ngwosapenya?

¹⁰Kodi Iye wakulangiza mitundu ya anthu, ndiye wosadzudzula? Si ndiye amene aphunzitsa munthu nzeru?

¹¹Yehova adziwa zolingalira za munthu, kuti zili zachabe.

¹²Wodala munthu amene mumlanga, Yehova; ndi kumphunzitsa m'chilamulo chanu;

¹³kuti mumpumitse masiku oipa; kufikira atakumbira woipa mbuna.

¹⁴Pakuti Yehova sadzasiya anthu ake, ndipo sadzataya cholandira chake.

¹⁵Pakuti chiweruzo chidzabwera kunka kuchilungamo, ndipo oongoka mtima onse adzachitsata.

¹⁶Adzandiukira ndani kutsutsana nao ochita zoipa? Adzandilimbikira ndani kutsutsana nao ochita zopanda pake?

¹⁷Akadapanda kukhala thandizo langa Yehova, moyo wanga ukadakhala kuli chete.

¹⁸Pamene ndinati, Litereka phazi langa, chifundo chanu, Yehova, chinandichirikiza.

¹⁹Pondichulukira zolingalira zanga m'kati mwanga, zotonthoza zanu zikondweretsa moyo wanga.

²⁰Kodi uyenera kuyanjana ndi Inu mpando wachifumu wa kusakaza, wakupanga chovuta chikhale lamulo?

²¹Asonkhana pamodzi pa moyo wa wolungama, namtsutsa wa mwazi wosachimwa.

²²Koma Yehova wakhala msanje wanga; ndi Mulungu wanga thanthwe lothawirapo ine.

²³Ndipo anawabwezera zopanda pake zao, nadzawaononga m'choipa chao; Yehova Mulungu wathu adzawaononga.