Read Chichewa Buku Lopatulika Bible 2014 MASALIMO 95 Bible Online

MASALIMO 95 - Chichewa Buku Lopatulika Bible 2014 bible

MASALIMO 95

¹Tiyeni tiimbire Yehova mokondwera; tifuule kwa thanthwe la chipulumutso chathu.

²Tidze nacho chiyamiko pamaso pake, timfuulire Iye mokondwera ndi nyimbo.

³Pakuti Yehova ndiye Mulungu wamkulu; ndi mfumu yaikulu yoposa milungu yonse.

⁴Malo ozama a dziko lapansi ali m'dzanja lake; chuma cha m'mapiri chomwe ndi chake.

⁵Nyanja ndi yake, anailenga; ndipo manja ake anaumba dziko louma.

⁶Tiyeni, tipembedze tiwerame; tigwade pamaso pa Yehova, amene anatilenga.

⁷Pakuti Iye ndiye Mulungu wathu, ndipo ife ndife anthu a pabusa pake, ndi nkhosa za m'dzanja mwake. Lero, mukamva mau ake!

⁸Musaumitse mitima yanu, ngati ku Meriba, ngati tsiku la ku Masa m'chipululu.

⁹Pamene makolo anu anandisuntha, anandiyesa, anapenyanso chochita Ine.

¹⁰Zaka makumi anai mbadwo uwu unandimvetsa chisoni, ndipo ndinati, Iwo ndiwo anthu osokerera mtima, ndipo sadziwa njira zanga.

¹¹Chifukwa chake ndinalumbira mu mkwiyo wanga, ngati adzalowa mpumulo wanga.