Read Chichewa Buku Lopatulika Bible 2014 MIYAMBO 1 Bible Online

MIYAMBO 1 - Chichewa Buku Lopatulika Bible 2014 bible

MIYAMBO 1

¹Miyambo ya Solomoni mwana wa Davide, mfumu ya Israele.

²Kudziwa nzeru ndi mwambo; kuzindikira mau ozindikiritsa;

³kulandira mwambo wakusamalira machitidwe, chilungamo, chiweruzo ndi zolunjika;

⁴kuchenjeza achibwana, kuphunzitsa mnyamata kudziwa ndi kulingalira;

⁵kuti wanzeru amve, naonjezere kuphunzira; ndi kuti wozindikira afikire kuuphungu;

⁶kuzindikira mwambi ndi tanthauzo lake, mau a anzeru, ndi zophiphiritsa zao.

⁷Kuopa Yehova ndiko chiyambi cha kudziwa; opusa anyoza nzeru ndi mwambo.

⁸Mwananga, tamva mwambo wa atate wako, ndi kusasiya chilangizo cha amai ako;

⁹pakuti izi ndi korona wa chisomo pamtu pako, ndi mkanda pakhosi pako.

¹⁰Mwananga, akakukopa ochimwa usalole.

¹¹Akanena, Idza nafe, tibisalire mwazi, tilalire osachimwa opanda chifukwa;

¹²tiwameze ali ndi moyo ngati manda, ali amphumphu, ngati akutsikira kudzenje;

¹³tidzapeza chuma chonse cha mtengo wake, tidzadzaza nyumba zathu ndi zofunkha;

¹⁴udzachita nafe maere, tonse tidzakhala ndi chotengeramo chimodzi.

¹⁵Mwananga, usayende nao m'njira; letsa phazi lako ku mayendedwe ao;

¹⁶pakuti mapazi ao athamangira zoipa, afulumira kukhetsa mwazi.

¹⁷Pakuti kutchera msampha pamaso pa mbalame ndi chabe;

¹⁸ndipo awa abisalira mwazi waowao, alalira miyoyo yaoyao.

¹⁹Mayendedwe a yense wopindula chuma monyenga ngotere; chilanda moyo wa eni ake.

²⁰Nzeru ifuula panja; imveketsa mau ake pabwalo;

²¹iitana posonkhana anthu polowera pachipata; m'mudzi inena mau ake,

²²Kodi mudzakonda zazibwana kufikira liti, achibwana inu? Onyoza ndi kukonda kunyoza, opusa ndi kuda nzeru?

²³Tembenukani pamene ndikudzudzulani; taonani, nditsanulira pa inu mzimu wanga, ndikudziwitsani mau anga.

²⁴Chifukwa ndaitana, ndipo munakana; ndatambasula dzanja langa, ndipo panalibe analabadira;

²⁵koma munapeputsa uphungu wanga wonse, ndi kukana kudzudzula kwanga.

²⁶Inetu ndidzachitira chiphwete tsoka lanu, ndidzatonyola pakudza mantha anu;

²⁷pakudza mantha anu ngati mphepo yopasula, ndi pofika tsoka lanu ngati kamvulumvulu; pakudza kwa inu vuto ndi nsautso.

²⁸Pamenepo adzandiitana, koma sindidzavomera; adzandifunatu, osandipeza ai;

²⁹chifukwa anada nzeru, sanafune kuopa Yehova;

³⁰anakana uphungu wanga, nanyoza kudzudzula kwanga konse;

³¹momwemo adzadya zipatso za mayendedwe ao, nadzakhuta zolingalira zao.

³²Pakuti kubwerera m'mbuyo kwa achibwana kudzawapha; ndipo mphwai za opusa zidzawaononga.

³³Koma wondimvera ine adzakhala osatekeseka, nadzakhala phee osaopa zoipa.