Read Chichewa Buku Lopatulika Bible 2014 MIYAMBO 10 Bible Online

MIYAMBO 10 - Chichewa Buku Lopatulika Bible 2014 bible

MIYAMBO 10

¹Miyambo ya Solomoni: Mwana wanzeru akondweretsa atate; koma mwana wopusa amvetsa amake chisoni.

²Chuma cha uchimo sichithangata; koma chilungamo chipulumutsa kuimfa.

³Yehova samvetsa njala moyo wa wolungama; koma amainga chifuniro cha wochimwa.

⁴Wochita ndi dzanja laulesi amasauka; koma dzanja la akhama lilemeretsa.

⁵Wokolola m'malimwe ndi mwana wanzeru; koma wogona pakutula ndi mwana wochititsa manyazi.

⁶Madalitso ali pamtu pa wolungama; koma m'kamwa mwa oipa mubisa chiwawa.

⁷Amayesa wolungama wodala pomkumbukira; koma dzina la oipa lidzavunda.

⁸Mwini mtima wanzeru amalandira malamulo; koma chitsiru cholongolola chidzagwa.

⁹Woyenda moongoka amayenda osatekeseka; koma wokhotetsa njira zake adzadziwika.

¹⁰Wotsinzinira achititsa chisoni; koma wodzudzula momveka achita mtendere.

¹¹M'kamwa mwa wolungama ndi kasupe wa moyo; koma m'kamwa mwa oipa mubisa chiwawa.

¹²Udani upikisanitsa; koma chikondi chikwirira zolakwa zonse.

¹³Nzeru ipezedwa m'milomo ya wozindikira; koma wopusa pamsana pake nthyole.

¹⁴Anzeru akundika zomwe adziwa; koma m'kamwa mwa chitsiru muononga tsopano lino.

¹⁵Chuma cha wolemera ndi mudzi wake wolimba; koma umphawi wao uononga osauka.

¹⁶Ntchito za wolungama zipatsa moyo; koma phindu la oipa lichimwitsa.

¹⁷Wosunga mwambo ali m'njira ya moyo; koma wosiya chidzudzulo asochera.

¹⁸Wobisa udani ali ndi milomo yonama; wonena ugogodi ndiye chitsiru.

¹⁹Pochuluka mau zolakwa sizisoweka; koma wokhala chete achita mwanzeru.

²⁰Lilime la wolungama likunga siliva wosankhika; koma mtima wa oipa uli wachabe.

²¹Milomo ya wolungama imadyetsa ambiri; koma zitsiru zimafa posowa nzeru.

²²Madalitso a Yehova alemeretsa, saonjezerapo chisoni.

²³Masewero a chitsiru ndiwo kuchita zoipa; koma masewero a wozindikira ndiwo nzeru.

²⁴Chomwe woipa achiopa chidzamfikira; koma chomwe olungama achifuna chidzapatsidwa.

²⁵Monga kavumbulu angopita, momwemo woipa kuli zii; koma olungama ndiwo maziko osatha.

²⁶Ngati vinyo wowawa m'mano, ndi utsi m'maso, momwemo waulesi kwa iwo amene amtuma.

²⁷Kuopa Yehova kutanimphitsa masiku; koma zaka za oipa zidzafinimpha.

²⁸Chiyembekezo cha olungama ndicho chimwemwe; koma chidikiro cha oipa chidzaonongeka.

²⁹Njira ya Yehova ndi linga kwa woongoka mtima; koma akuchita zoipa adzaonongeka.

³⁰Wolungama sadzachotsedwa konse; koma oipa sadzakhalabe m'dziko.

³¹M'kamwa mwa wolungama mulankhula nzeru; koma lilime lokhota lidzadulidwa.

³²Milomo ya wolungama idziwa zokondweretsa; koma m'kamwa mwa oipa munena zokhota.