Read Chichewa Buku Lopatulika Bible 2014 MIYAMBO 11 Bible Online

MIYAMBO 11 - Chichewa Buku Lopatulika Bible 2014 bible

MIYAMBO 11

¹Muyeso wonyenga unyansa Yehova; koma mulingo wamphumphu umsekeretsa.

²Pakudza kudzikuza padzanso manyazi; koma nzeru ili ndi odzichepetsa.

³Kuongoka mtima kwa olungama kuwatsogolera; koma kukhota kwa achiwembu kudzawaononga.

⁴Chuma sichithandiza tsiku la mkwiyo; koma chilungamo chipulumutsa kuimfa.

⁵Chilungamo cha wangwiro chimaongola njira yake; koma woipa adzagwa ndi zoipa zake.

⁶Chilungamo cha oongoka mtima chidzawapulumutsa; koma achiwembu adzagwidwa ndi mphulupulu yao.

⁷Pomwalira woipa chidikiro chake chionongeka; chiyembekezo cha uchimo chionongeka.

⁸Wolungama apulumuka kuvuto; woipa nalowa m'malo mwake.

⁹Wonyoza Mulungu aononga mnzake ndi m'kamwa mwake; koma olungama adzapulumuka pakudziwa.

¹⁰Olungama akapeza bwino, mudzi usekera; nufuula pakuonongeka oipa.

¹¹Madalitso a olungama akuza mudzi; koma m'kamwa mwa oipa muupasula.

¹²Wopeputsa mnzake asowa nzeru; koma wozindikira amatonthola.

¹³Kazitape woyendayenda amawanditsa zinsinsi; koma wokhulupirika mtima abisa mau.

¹⁴Popanda upo wanzeru anthu amagwa; koma pochuluka aphungu pali chipulumutso.

¹⁵Woperekera mlendo chikole adzaphwetekwapo; koma wakuda chikole akhala ndi mtendere.

¹⁶Mkazi wodekha agwiritsa ulemu; aukali nagwiritsa chuma.

¹⁷Wachifundo achitira moyo wake zokoma; koma wankhanza avuta nyama yake.

¹⁸Woipa alandira malipiro onyenga; koma wofesa chilungamo aonadi mphotho.

¹⁹Wolimbikira chilungamo alandira moyo; koma wolondola zoipa adzipha yekha.

²⁰Okhota mtima anyansa Yehova; koma angwiro m'njira zao amsekeretsa.

²¹Zoonadi, wochimwa sadzapulumuka chilango; koma mbeu ya olungama idzalanditsidwa.

²²Monga chipini chagolide m'mphuno ya nkhumba, momwemo mkazi wokongola wosasinkhasinkha bwino.

²³Chifuniro cha olungama chifikitsa zabwino zokha; koma chiyembekezo cha oipa mkwiyo.

²⁴Alipo wogawira, nangolemerabe; aliponso womana chomwe ayenera kupatsa nangosauka.

²⁵Mtima wa mataya udzalemera; wothirira madzi nayenso adzathiriridwa.

²⁶Womana tirigu anthu amtemberera; koma madalitso adzakhala pamtu pa wogulitsa.

²⁷Wopwaira ubwino afunitsa chikondwerero; koma zoipa zidzamfikira wozilondola.

²⁸Wokhulupirira chuma chake adzagwa; koma olungama adzaphuka ngati tsamba.

²⁹Wovuta banja lake adzalowa m'zomsautsa; wopusa adzatumikira wanzeru.

³⁰Chipatso cha wolungama ndi mtengo wa moyo; ndipo wokola mtima ali wanzeru.

³¹Taonani, wolungama adzalandira mphotho kunja kuno; koposa kotani woipa ndi wochimwa?