Read Chichewa Buku Lopatulika Bible 2014 MIYAMBO 13 Bible Online

MIYAMBO 13 - Chichewa Buku Lopatulika Bible 2014 bible

MIYAMBO 13

¹Mwana wanzeru amamvera mwambo wa atate; koma wonyoza samvera chidzudzulo.

²Munthu adzadya zabwino ndi zipatso za m'kamwa mwake; koma moyo wa achiwembu udzadya chiwawa.

³Wogwira pakamwa pake asunga moyo wake; koma woyasamula milomo yake adzaonongeka.

⁴Moyo wa waulesi ukhumba osalandira kanthu; koma moyo wa akhama udzalemera.

⁵Wolungama ada mau onama; koma woipa anyansa, nadzichititsa manyazi.

⁶Chilungamo chitchinjiriza woongoka m'njira; koma udyo ugwetsa wochimwa.

⁷Alipo wodziyesa wolemera, koma alibe kanthu; alipo wodziyesa wosauka, koma ali ndi chuma chambiri.

⁸Chiombolo cha moyo wa munthu ndicho chuma chake; koma wosauka samva chidzudzulo.

⁹Kuunika kwa olungama kukondwa; koma nyali ya oipa idzazima.

¹⁰Kudzikuza kupikisanitsa; koma omwe anauzidwa uphungu ali ndi nzeru.

¹¹Chuma cholandiridwa mokangaza chidzachepa; koma wokundika ndi dzanja adzaona zochuluka.

¹²Chiyembekezo chozengereza chidwalitsa mtima; koma pakufika chifunirocho ndicho mtengo wa moyo.

¹³Wonyoza mau adziononga yekha; koma woopa malangizo adzalandira mphotho.

¹⁴Malamulo a wanzeru ndiwo kasupe wa moyo, apatutsa kumisampha ya imfa.

¹⁵Nzeru yabwino ipatsa chisomo; koma njira ya achiwembu ili makolokoto.

¹⁶Yense wochenjera amachita mwanzeru; koma wopusa aonetsa utsiru.

¹⁷Mthenga wolakwa umagwa m'zoipa; koma mtumiki wokhulupirika alamitsa.

¹⁸Wokana mwambo adzasauka nanyozedwa; koma wolabadira chidzudzulo adzalemekezedwa.

¹⁹Chifuniro chikondweretsa moyo chitachitidwa; koma kusiya zoipa kunyansa opusa.

²⁰Ukayenda ndi anzeru udzakhala wanzeru: koma mnzao wa opusa adzaphwetekedwa.

²¹Zoipa zilondola ochimwa; koma olungama adzalandira mphotho yabwino.

²²Wabwino asiyira zidzukulu zake cholowa chabwino; koma wochimwa angosungira wolungama chuma chake.

²³M'kulima kwa osauka muli zakudya zambiri; koma zinazo zimaonongeka posowa chiweruzo.

²⁴Wolekerera mwanake osammenya amuda; koma womkonda amyambize kumlanga.

²⁵Wolungama adya nakhutitsa moyo wake; koma mimba ya oipa idzasowa.