Read Chichewa Buku Lopatulika Bible 2014 MIYAMBO 14 Bible Online

MIYAMBO 14 - Chichewa Buku Lopatulika Bible 2014 bible

MIYAMBO 14

¹Mkazi yense wanzeru amanga banja lake; koma wopusa alipasula ndi manja ake.

²Woyenda moongoka mtima aopa Yehova; koma wokhota m'njira yake amnyoza.

³M'kamwa mwa chitsiru muli nthyole ya kudzikuza; koma milomo ya anzeru idzawasunga.

⁴Popanda zoweta modyera muti see; koma mphamvu ya ng'ombe ichulukitsa phindu.

⁵Mboni yokhulupirika sidzanama; koma mboni yonyenga imalankhula zonama.

⁶Wonyoza afunafuna nzeru osaipeza; koma wozindikira saona vuto m'kuphunzira.

⁷Pita pamaso pa munthu wopusa, sudzazindikira milomo yakudziwa.

⁸Nzeru ya wochenjera ndiyo yakuti azindikire njira yake; koma utsiru wa opusa ndiwo chinyengo.

⁹Zitsiru zinyoza kupalamula; koma mwa oongoka mtima muli chiyanjano.

¹⁰Mtima udziwa kuwawa kwakekwake; mlendo sadudukira ndi chimwemwe chake.

¹¹Nyumba ya oipa idzapasuka; koma hema wa oongoka mtima adzakula.

¹²Ilipo njira yooneka kwa mwamuna ngati yoongoka; koma matsiriziro ake ndi njira za imfa.

¹³Ngakhale m'kuseka mtima uwawa; ndipo matsiriziro a chiphwete ndi chisoni.

¹⁴Wobwerera m'mbuyo m'mtima adzakhuta njira yake; koma munthu wabwino adzakhuta za mwa iye yekha.

¹⁵Wachibwana akhulupirira mau onse; koma wochenjera asamalira mayendedwe ake.

¹⁶Wanzeru amaopa nasiya zoipa; koma wopusa amanyada osatekeseka.

¹⁷Wokangaza kukwiya adzachita utsiru; ndipo munthu wa ziwembu adzadedwa.

¹⁸Achibwana amalandira cholowa cha utsiru; koma ochenjera amavala nzeru ngati korona.

¹⁹Oipa amagwadira abwino, ndi ochimwa pa makomo a olungama.

²⁰Waumphawi adedwa ndi anzake omwe; koma akukonda wolemera achuluka.

²¹Wonyoza anzake achimwa; koma wochitira osauka chifundo adala.

²²Kodi oganizira zoipa sasochera? Koma akuganizira zabwino adzalandira chifundo ndi ntheradi.

²³M'ntchito zonse muli phindu; koma kulankhulalankhula kungopatsa umphawi.

²⁴Korona wa anzeru ndi chuma chao; utsiru wa opusa ndiwo utsiru.

²⁵Mboni yoona imalanditsa miyoyo; koma wolankhula zonama angonyenga.

²⁶Wakuopa Yehova akhulupirira kolimba; ndipo ana ake adzakhala ndi pothawirapo.

²⁷Kuopa Yehova ndiko kasupe wa moyo, kupatutsa kumisampha ya imfa.

²⁸Mu unyinji wa anthu muli ulemu wa mfumu; koma popanda anthu kalonga aonongeka.

²⁹Wosakwiya msanga apambana kumvetsa; koma wansontho akuza utsiru.

³⁰Mtima wabwino ndi moyo wa thupi; koma nsanje ivunditsa mafupa.

³¹Wotsendereza aumphawi atonza Mlengi wake; koma wochitira wosauka chifundo amlemekeza.

³²Wochimwa adzakankhidwa m'kuipa kwake; koma wolungama akhulupirirabe pomwalira.

³³Nzeru ikhalabe m'mtima wa wozindikira, nidziwika pakati pa opusa.

³⁴Chilungamo chikuza mtundu wa anthu; koma tchimo lichititsa fuko manyazi.

³⁵Mfumu ikomera mtima kapolo wochita mwanzeru; koma idzakwiyira wochititsa manyazi.