Read Chichewa Buku Lopatulika Bible 2014 MIYAMBO 15 Bible Online

MIYAMBO 15 - Chichewa Buku Lopatulika Bible 2014 bible

MIYAMBO 15

¹Mayankhidwe ofatsa abweza mkwiyo; koma mau owawitsa aputa msunamo.

²Lilime la anzeru linena bwino zomwe adziwa; koma m'kamwa mwa opusa mutsanulira utsiru.

³Maso a Yehova ali ponseponse, nayang'anira oipa ndi abwino.

⁴Kuchiza lilime ndiko mtengo wa moyo; koma likakhota liswa moyo.

⁵Chitsiru chipeputsa mwambo wa atate wake; koma wosamalira chidzudzulo amachenjera.

⁶M'nyumba ya wolungama muli katundu wambiri; koma m'phindu la woipa muli vuto.

⁷Milomo ya anzeru iwanditsa nzeru, koma mtima wa opusa suli wolungama.

⁸Nsembe ya oipa inyansa Yehova; koma pemphero la oongoka mtima limkondweretsa.

⁹Njira ya oipa inyansa Yehova; koma akonda wolondola chilungamo.

¹⁰Wosiya njira adzalangidwa mowawa; wakuda chidzudzulo adzafa.

¹¹Kumanda ndi kuchionongeko kuli pamaso pa Yehova; koposa kotani nanga mitima ya ana a anthu?

¹²Wonyoza sakonda kudzudzulidwa, samapita kwa anzeru.

¹³Mtima wokondwa usekeretsa nkhope; koma moyo umasweka ndi zowawa za m'mtima.

¹⁴Mtima wa wozindikira ufunitsa kudziwa; koma m'kamwa mwa opusa mudya utsiru.

¹⁵Masiku onse a wosauka ali oipa; koma wokondwera mtima ali ndi phwando losatha.

¹⁶Zapang'ono, ulikuopa Yehova, zipambana ndi katundu wambiri pokhala phokoso.

¹⁷Kudya masamba, pali chikondano, kuposa ng'ombe yonenepa pali udani.

¹⁸Munthu wozaza aputa makani; koma wosakwiya msanga atonthoza makangano.

¹⁹Mayendedwe a waulesi akunga linga laminga, koma njira ya oongoka mtima iundidwa ngati mseu.

²⁰Mwana wanzeru akondweretsa atate wake; koma munthu wopusa apeputsa amake.

²¹Wosowa nzeru akondwera ndi utsiru; koma munthu wozindikira aongola mayendedwe ake.

²²Zolingalira zizimidwa popanda upo; koma pochuluka aphungu zikhazikika.

²³Munthu akondwera ndi mayankhidwe a m'kamwa mwake; ndi mau a pa nthawi yake kodi sali abwino?

²⁴Anzeru ayesa njira yamoyo yokwerakwera, kuti apatuke kusiya kunsi kwa manda.

²⁵Yehova adzapasula nyumba ya wonyada; koma adzalembera mkazi wamasiye malire ake.

²⁶Ziwembu zoipa zinyansa Yehova; koma oyera mtima alankhula mau okondweretsa.

²⁷Wopindula monyenga avuta nyumba yake; koma wakuda mitulo adzakhala ndi moyo.

²⁸Mtima wa wolungama uganizira za mayankhidwe; koma m'kamwa mwa ochimwa mutsanulira zoipa.

²⁹Yehova atalikira oipa; koma pemphero la olungama alimvera.

³⁰Kuunika kwa maso kukondweretsa mtima; ndipo pomveka zabwino mafupa amatenga uwisi.

³¹Khutu lomvera chidzudzulo cha moyo lidzakhalabe mwa anzeru.

³²Wokana mwambo apeputsa moyo wake; koma wosamalira chidzudzulo amatenga nzeru.

³³Kuopa Yehova ndiko mwambo wanzeru; ndipo chifatso chitsogolera ulemu.