Read Chichewa Buku Lopatulika Bible 2014 MIYAMBO 16 Bible Online

MIYAMBO 16 - Chichewa Buku Lopatulika Bible 2014 bible

MIYAMBO 16

¹Malongosoledwe a mtima nga munthu; koma mayankhidwe a lilime achokera kwa Yehova.

²Njira zonse za munthu ziyera pamaso pake; koma Yehova ayesa mizimu.

³Pereka zochita zako kwa Yehova, ndipo zolingalira zako zidzakhazikika.

⁴Zonse Yehova anazipanga zili ndi zifukwa zao; ngakhale amphulupulu kuti aone tsiku loipa.

⁵Yense wonyada mtima anyansa Yehova; zoonadi sadzapulumuka chilango.

⁶Mphulupulu iomboledwa ndi chifundo ndi ntheradi; apatuka pa zoipa poopa Yehova.

⁷Njira za munthu zikakonda Yehova ayanjanitsana naye ngakhale adani ake.

⁸Zapang'ono, pokhala chilungamo, ziposa phindu lalikulu lopanda chiweruzo.

⁹Mtima wa munthu ulingalira njira yake; koma Yehova ayendetsa mapazi ake.

¹⁰Mau a mlauli ali m'milomo ya mfumu; m'kamwa mwake simudzachita chetera poweruza.

¹¹Mwini muyeso ndi mulingo wolungama ndiye Yehova; ndiyenso anapanga miyala yonse yoyesera ya m'thumba.

¹²Kuchita mphulupulu kunyansa mafumu; pakuti mpando wao wakhazikika ndi chilungamo.

¹³Milomo yolungama ikondweretsa mafumu; wonena zoongoka amkonda.

¹⁴Mkwiyo wa mfumu ndi mithenga ya imfa; wanzeru adzaukhulula.

¹⁵M'kuunika kwa nkhope ya mfumu muli moyo; kukoma mtima kwake kunga mtambo wa mvula ya masika.

¹⁶Kodi kulandira nzeru sikupambana ndi golide, kulandira luntha ndi kusankhika koposa siliva?

¹⁷Khwalala la oongoka mtima ndilo lakuti asiye zoipa; wosunga njira yake atchinjiriza moyo wake.

¹⁸Kunyada kutsogolera kuonongeka; mtima wodzikuza ndi kutsogolera kuphunthwa.

¹⁹Kufatsa mtima ndi osauka kuposa kugawana zofunkha ndi onyada.

²⁰Wolabadira mau adzapeza bwino; ndipo wokhulupirira Yehova adala.

²¹Wanzeru mtima adzatchedwa wochenjera; ndipo kukoma kwa milomo kuonjezera kuphunzira.

²²Nzeru ndi kasupe wa moyo kwa mwini wake; koma mwambo wa zitsiru ndi utsiru.

²³Mtima wa wanzeru uchenjeza m'kamwa mwake, nuphunzitsanso milomo yake.

²⁴Mau okoma ndiwo chisa cha uchi, otsekemera m'moyo ndi olamitsa mafupa.

²⁵Ilipo njira yooneka kwa mwamuna ngati yoongoka, koma matsiriziro ake ndi njira za imfa.

²⁶Wantchito adzigwirira yekha ntchito; pakuti m'kamwa mwake mumfulumiza.

²⁷Munthu wopanda pake akonzeratu zoipa; ndipo m'milomo mwake muli moto wopsereza.

²⁸Munthu wokhota amautsa makani; kazitape afetsa ubwenzi.

²⁹Munthu wa chiwawa akopa mnzake, namuyendetsa m'njira yosakhala bwino.

³⁰Wotsinzina ndiye aganizira zokhota; wosunama afikitsa zoipa.

³¹Imvi ndiyo korona wa ulemu, idzapezedwa m'njira ya chilungamo.

³²Wosakwiya msanga aposa wamphamvu; wolamulira mtima wake naposa wolanda mudzi.

³³Maere aponyedwa pamfunga; koma ndiye Yehova alongosola zonse.