Read Chichewa Buku Lopatulika Bible 2014 MIYAMBO 17 Bible Online

MIYAMBO 17 - Chichewa Buku Lopatulika Bible 2014 bible

MIYAMBO 17

¹Nyenyeswa youma, pokhala mtendere, iposa nyumba yodzala nyama yansembe, pali makangano.

²Kapolo wochita mwanzeru adzalamulira mwana wochititsa manyazi, nadzagawana nao abale cholowa.

³ Siliva ali ndi mbiya yosungunulira, golide ali ndi ng'anjo; koma Yehova ayesa mitima.

⁴Wochimwa amasamalira milomo yolakwa; wonama amvera lilime losakaza.

⁵Wochitira chiphwete aumphawi atonza Mlengi; wokondwera ndi tsoka sadzapulumuka chilango.

⁶Zidzukulu ndizo korona wa okalamba; ndipo ulemerero wa ana ndiwo atate ao.

⁷Mlomo wangwiro suyenera chitsiru; ngakhale mlomo wonama suyenera kalonga ndi pang'ono ponse.

⁸Wolandira chokometsera mlandu achiyesa ngale; paliponse popita iye achenjera.

⁹Wobisa cholakwa afunitsa chikondano; koma wobwerezabwereza mau afetsa ubwenzi.

¹⁰Chidzudzulo chilowa m'kati mwa wozindikira, kopambana ndi kukwapula wopusa kwambiri.

¹¹Woipa amafuna kupanduka kokha; koma adzamtumizira mthenga wankhanza.

¹²Kukomana ndi chitsiru m'kupusa kwake kuopsa koposa chilombo chochichotsera anake.

¹³Wobwezera zabwino zoipa, zoipa sizidzamchokera kwao.

¹⁴Chiyambi cha ndeu chifanana ndi kutsegulira madzi; tsono kupikisana kusanayambe tasiya makani.

¹⁵Wokometsa mlandu wa wamphulupulu, ndi wotsutsa wolungama, onse awiriwa amnyansa Yehova.

¹⁶Kodi bwanji mtengo wogulira nzeru uli m'dzanja la chitsiru, popeza wopusa alibe mtima?

¹⁷Bwenzi limakonda nthawi zonse; ndipo mbale anabadwira kuti akuthandize pooneka tsoka.

¹⁸Munthu wosowa nzeru apangana kulipirira wina, napereka chikole pamaso pa mnzake.

¹⁹Wokonda ndeu akonda kulakwa; ndipo wotalikitsa khomo lake afunafuna kuonongeka.

²⁰Wokhota mtima sadzapeza bwino; ndipo mwini lilime lokhota adzagwa m'zoipa.

²¹Wobala chitsiru adzichititsa chisoni; ndipo atate wa wopusa sakondwa.

²²Mtima wosekerera uchiritsa bwino; koma mzimu wosweka uphwetsa mafupa.

²³Munthu woipa alandira chokometsera mlandu chotulutsa m'mfunga, kuti apatukitse mayendedwe a chiweruzo.

²⁴Nzeru ili pamaso pa wozindikira; koma maso a wopusa ali m'malekezero a dziko.

²⁵Mwana wopusa achititsa atate wake chisoni, namvetsa zowawa amake wombala.

²⁶Kulipiritsa wolungama sikuli kwabwino, ngakhale kukwapula akulu chifukwa aongoka mtima.

²⁷Wopanda chikamwakamwa apambana kudziwa; ndipo wofatsa mtima ali wanzeru.

²⁸Ngakhale chitsiru chikatonthola achiyesa chanzeru; posunama ali wochenjera.