Read Chichewa Buku Lopatulika Bible 2014 MIYAMBO 18 Bible Online

MIYAMBO 18 - Chichewa Buku Lopatulika Bible 2014 bible

MIYAMBO 18

¹Wopanduka afunafuna chifuniro chake, nakangana ndi nzeru yonse yeniyeni.

²Wopusa sakondwera ndi kuzindikira; koma kungovumbulutsa za m'mtima mwake.

³Pakudza wamphulupulu padzanso kunyoza; manyazi natsagana ndi chitonzo.

⁴Mau a m'kamwa mwa munthu ndiwo madzi akuya; kasupe wa nzeru ndiye mtsinje wodzala.

⁵Kukometsa mlandu wa wamphulupulu mwatsankho sikuli kwabwino, ngakhale kuchitira chetera wolungama.

⁶Milomo ya wopusa ifikitsa makangano; ndipo m'kamwa mwake muputa kukwapulidwa.

⁷M'kamwa mwa wopusa mumuononga, milomo yake ikhala msampha wa moyo wake.

⁸Mau akazitape akunga zakudya zolongosoka, zotsikira m'kati mwa mimba.

⁹Wogwira ntchito mwaulesi ndiye mbale wake wa wosakaza.

¹⁰Dzina la Yehova ndilo nsanja yolimba; wolungama athamangiramo napulumuka.

¹¹Chuma cha wolemera ndicho mudzi wake wolimba; alingalira kuti ndicho khoma lalitali.

¹²Mtima wa munthu unyada asanaonongeke; koma chifatso chitsogolera ulemu.

¹³Wobwezera mau asanamvetse apusa, nadzichititsa manyazi.

¹⁴Mtima wa munthu umlimbitsa alikudwala; koma ndani angatukule mtima wosweka?

¹⁵Mtima wa wozindikira umaphunzira; khutu la anzeru lifunitsa kudziwa.

¹⁶Mtulo wa munthu umtsegulira njira, numfikitsa pamaso pa akulu.

¹⁷Woyamba kudzinenera ayang'anika wolungama; koma mnzake afika namuululitsa zake zonse.

¹⁸Maere aletsa makangano, nulekanitsa amphamvu.

¹⁹Kupembedza mbale utamchimwira nkovuta, kulanda mudzi wolimba nkosavuta; makangano akunga mipiringidzo ya linga.

²⁰Mimba ya munthu idzakhuta zipatso za m'kamwa mwake; iye nadzakhuta phindu la milomo yake.

²¹Lilime lili ndi mphamvu pa imfa ndi moyo; wolikonda adzadya zipatso zake.

²²Wopeza mkazi apeza chinthu chabwino; Yehova amkomera mtima.

²³Wosauka amadandaulira; koma wolemera ayankha mwaukali.

²⁴Woyanjana ndi ambiri angodziononga; koma lilipo bwenzi lipambana ndi mbale kuumirira.