Read Chichewa Buku Lopatulika Bible 2014 MIYAMBO 19 Bible Online

MIYAMBO 19 - Chichewa Buku Lopatulika Bible 2014 bible

MIYAMBO 19

¹Wosauka woyenda mwangwiro aposa wokhetsa milomo ndi wopusa.

²Kukhumba kosadziwa sikuli kwabwino; ndipo wofulumira ndi mapazi ake amachimwa.

³Utsiru wa munthu ukhotetsa njira yake; mtima wake udandaula pa Yehova.

⁴Chuma chionjezetsa mabwenzi ambiri; koma mnzake wa waumphawi amleka.

⁵Mboni yonama sidzakhala yosalangidwa; wolankhula mabodza sadzapulumuka.

⁶Ambiri adzapembedza waufulu; ndipo yense ndi bwenzi la munthu wopatsa.

⁷Abale onse a wosauka amuda; nanga mabwenzi ake kodi satanimphirana naye? Awatsata ndi mau, koma kuli zii.

⁸Wolandira nzeru akonda moyo wake; wosunga luntha adzapeza zabwino.

⁹Mboni yonama sidzapulumuka chilango; wolankhula mabodza adzaonongeka.

¹⁰Wopusa sayenera kukhala ndi zinthu zolongosoka; nanga kapolo ayenera kulamulira akalonga kodi?

¹¹Kulingalira kwa munthu kuchedwetsa mkwiyo; ulemerero wake uli wakuti akhululukire cholakwa.

¹²Mkwiyo wa mfumu ukunga kubangula kwa mkango; koma kukoma mtima kwake kunga mame pamsipu.

¹³Mwana wopusa ndiye tsoka la atate wake; ndipo makangano a mkazi ndiwo kudonthadonthabe.

¹⁴Nyumba ndi chuma ndizo cholowa cha atate; koma mkazi wanzeru achokera kwa Yehova.

¹⁵Ulesi ugonetsa tulo tofa nato; ndipo moyo wamkhongono udzamva njala.

¹⁶Wosunga lamulo asunga moyo wake; wonyalanyaza mayendedwe ake adzafa.

¹⁷Wochitira waumphawi chifundo abwereka Yehova; adzambwezera chokoma chakecho.

¹⁸Menya mwanako, chiyembekezero chilipo, osafunitsa kumuononga.

¹⁹Munthu waukali alipire mwini; pakuti ukampulumutsa udzateronso.

²⁰Tamvera uphungu, nulandire mwambo, kuti ukhale wanzeru pa chimaliziro chako.

²¹Muli zolingalira zambiri m'mtima mwa munthu; koma uphungu wa Yehova ndiwo udzaimika.

²²Chotikondetsa munthu ndicho kukoma mtima kwake; ndipo wosauka apambana munthu wonama.

²³Kuopa Yehova kupatsa moyo; wokhala nako adzakhala wokhuta; zoipa sizidzamgwera.

²⁴Waulesi alonga dzanja lake m'mbale, osalibwezanso kukamwa kwake.

²⁵Menya wonyoza, ndipo achibwana adzachenjera; nudzudzule wozindikira adzazindikira nzeru.

²⁶Wolanda za atate, ndi wopirikitsa amai, ndiye mwana wochititsa manyazi ndi wogwetsa nkhope.

²⁷Ukangofuna, mwananga, kusochera kusiya mau akudziwitsa, leka kumva mwambo.

²⁸Mboni yopanda pake inyoza chiweruzo; m'kamwa mwa amphulupulu mumeza zoipa.

²⁹Akonzera onyoza chiweruzo, ndi mikwingwirima pamsana pa opusa.