Read Chichewa Buku Lopatulika Bible 2014 MIYAMBO 2 Bible Online

MIYAMBO 2 - Chichewa Buku Lopatulika Bible 2014 bible

MIYAMBO 2

¹Mwananga, ukalandira mau anga, ndi kusunga malamulo anga;

²kutcherera makutu ako kunzeru, kulozetsa mtima wako kukuzindikira;

³ukaitananso luntha, ndi kufuulira kuti ukazindikire;

⁴ukaifunafuna ngati siliva, ndi kuipwaira ngati chuma chobisika;

⁵pompo udzazindikira kuopa Yehova ndi kumdziwadi Mulungu.

⁶Pakuti Yehova apatsa nzeru; kudziwa ndi kuzindikira kutuluka m'kamwa mwake.

⁷Iye asungira oongoka mtima nzeru yeniyeni; ndiye chikopa cha oyenda molunjika;

⁸kuti atchinjirize njira za chiweruzo, nadikire khwalala la opatulidwa ake.

⁹Pamenepo udzazindikira chilungamo ndi chiweruzo, zolunjika ndi mayendedwe onse abwino.

¹⁰Pakuti nzeru idzalowa m'mtima mwako, moyo wako udzakondwera ndi kudziwa,

¹¹kulingalira kudzakudikira, kuzindikira kudzakutchinjiriza;

¹²kukupulumutsa kunjira yoipa, kwa anthu onena zokhota;

¹³akusiya mayendedwe olungama, akayende m'njira za mdima;

¹⁴omwe asangalala pochita zoipa, nakondwera ndi zokhota zoipa;

¹⁵amene apotoza njira zao, nakhotetsa mayendedwe ao.

¹⁶Nzeru idzakupulumutsa kwa mkazi wachiwerewere, kwa mkazi wachilendo wosyasyalika ndi mau ake;

¹⁷wosiya bwenzi la ubwana wake, naiwala chipangano cha Mulungu wake.

¹⁸Nyumba yake itsikira kuimfa, ndi mayendedwe ake kwa akufa;

¹⁹onse akunka kwa iye sabweranso, safika kunjira za moyo;

²⁰nzeru idzakuyendetsa m'njira ya anthu abwino, kuti usunge mayendedwe a olungama.

²¹Pakuti oongoka mtima adzakhala m'dziko, angwiro nadzatsalamo.

²²Koma oipa adzalikhidwa m'dziko, achiwembu adzazulidwamo.