Read Chichewa Buku Lopatulika Bible 2014 MIYAMBO 20 Bible Online

MIYAMBO 20 - Chichewa Buku Lopatulika Bible 2014 bible

MIYAMBO 20

¹Vinyo achita chiphwete, chakumwa chaukali chisokosa; wosochera nazo alibe nzeru.

²Kuopsa kwa mfumu ndiko kubangula kwa mkango; womputa achimwira moyo wakewake.

³Kuli ulemu kwa mwamuna kupewa ndeu; koma zitsiru zonse zimangokangana.

⁴Waulesi salima chifukwa cha chisanu; adzapemphapempha m'masika osalandira kanthu.

⁵Uphungu wa m'mtima mwa munthu ndiwo madzi akuya; koma munthu wozindikira adzatungapo.

⁶Anthu ambiri abukitsa yense kukoma mtima kwake; koma ndani angapeze munthu wokhulupirika?

⁷Wolungama woyenda mwangwiro, anake adala pambuyo pake.

⁸Mfumu yokhala pa mpando woweruzira ipirikitsa zoipa zonse ndi maso ake.

⁹Ndani anganene, Ndasambitsa mtima wanga, ndayera opanda tchimo?

¹⁰Miyeso yosiyana, ndi malichero osiyana, zonse ziwirizi zinyansa Yehova.

¹¹Ngakhale mwana adziwika ndi ntchito zake; ngati ntchito yake ili yoyera ngakhale yolungama.

¹²Khutu lakumva, ndi diso lopenya, Yehova anapanga onse awiriwo.

¹³Usakonde tulo ungasauke; phenyula maso, udzakhuta zakudya.

¹⁴Wogula ati, Chachabe chimenecho, koma atachoka adzitama.

¹⁵Alipo golide ndi ngale zambiri; koma milomo yodziwa ndiyo chokometsera cha mtengo wapatali.

¹⁶Tenga malaya a woperekera mlendo chikole; woperekera mkazi wachilendo chikole umgwire mwini.

¹⁷Zakudya za chinyengo zikondweretsa munthu; koma pambuyo pake m'kamwa mwake mudzadzala tinsangalabwi.

¹⁸Uphungu utsimikiza zolingalira, ponya nkhondo utapanga upo.

¹⁹Kazitape woyendayenda awanditsa zinsinsi; usadudukire woyasama milomo yake.

²⁰Wotemberera atate wake ndi amake, nyali yake idzazima mu mdima woti bii.

²¹Cholowa chingalandiridwe msangamsanga poyamba pake; koma chitsiriziro chake sichidzadala.

²²Usanene, Ndidzabwezera zoipa; yembekeza Yehova, adzakupulumutsa.

²³Miyeso yosiyana inyansa Yehova, ndi mulingo wonyenga suli wabwino.

²⁴Yehova alongosola mayendedwe a mwamuna; munthu tsono angazindikire bwanji njira yake?

²⁵Kunena mwansontho, Ichi nchopatulika, kuli msampha kwa munthu, ndi kusinkhasinkha pambuyo pake atawinda.

²⁶Mfumu yanzeru ipeta amphulupulu, niyendetsapo njinga ya galeta.

²⁷Mzimu wa munthu ndiwo nyali ya Yehova; usanthula m'kati monse mwa mimba.

²⁸Chifundo ndi ntheradi zisunga mfumu; chifundo chichirikiza mpando wake.

²⁹Ulemerero wa anyamata ndiwo mphamvu yao; kukongola kwa nkhalamba ndi imvi.

³⁰Mikwingwirima yopweteka ichotsa zoipa; ndi mikwapulo ilowa m'kati mwa mimba.