Read Chichewa Buku Lopatulika Bible 2014 MIYAMBO 21 Bible Online

MIYAMBO 21 - Chichewa Buku Lopatulika Bible 2014 bible

MIYAMBO 21

¹Mtima wa mfumu uli m'dzanja la Yehova ngati mitsinje ya madzi; aulozetsa komwe afuna.

²Njira zonse za munthu zilungama pamaso pake; koma Yehova ayesa mitima.

³Kuchita chilungamo ndi chiweruzo kupambana ndi nsembe kumkonda Yehova.

⁴Maso akunyada, ndi mtima wodzikuza, ndi nyali ya oipa, zili tchimo.

⁵Zoganizira za wakhama zichulukitsadi katundu; koma yense wansontho angopeza umphawi.

⁶Kupata chuma ndi lilime lonama ndiko nkhungu yoyendayenda, ngakhale misampha ya imfa.

⁷Chiwawa cha amphulupulu chidzawakokolola; chifukwa akana kuchita chiweruzo.

⁸Wosenza tchimo njira yake ikhotakhota; koma ntchito ya woyera mtima ilungama.

⁹Kukhala pangodya ya tsindwi kufunika kuposa kukhala m'nyumba ndi mkazi wolongolola.

¹⁰Wamphulupulu mtima wake umkhumba zoipa; sakomera mtima mnzake.

¹¹Polangidwa wonyoza, wachibwana alandira nzeru, naphunzira pakuyang'ana pa wanzeru.

¹²Wolungama aganizira za nyumba ya wamphulupulu, kuti amphulupulu amagwetsedwa, naona zoipa.

¹³Wotseka makutu ake polira waumphawi, nayenso adzalira koma osamvedwa.

¹⁴Mphatso ya m'tseri ipembedza mkwiyo, ndi mtulo wa pamfunga ukali wolimba.

¹⁵Kuchita chiweruzo kukondweretsa wolungama; koma kuwaononga akuchita mphulupulu.

¹⁶Munthu wosochera pa njira ya nzeru adzakhala m'msonkhano wa akufa.

¹⁷Wokonda zoseketsa adzasauka; wokonda vinyo ndi mafuta sadzalemera.

¹⁸Wochimwa ndiye chiombolo cha wolungama; ndipo wachiwembu adzalowa m'malo mwa oongoka mtima.

¹⁹Kukhala m'chipululu kufunika kuposa kukhala ndi mkazi wolongolola ndi wong'ung'udza.

²⁰Mokhala wanzeru muli katundu wofunika ndi mafuta; koma wopusa angozimeza.

²¹Wolondola chilungamo ndi chifundo apeza moyo, ndi chilungamo, ndi ulemu.

²²Wanzeru akwera pa mudzi wa olimba, nagwetsa mphamvu yake imene anaikhulupirira.

²³Wosunga m'kamwa mwake ndi lilime lake asunga moyo wake kumavuto.

²⁴Wonyada wodzikuza dzina lake ndiye wonyoza; achita mwaukali modzitama.

²⁵Chifuniro cha waulesi chimupha; chifukwa manja ake akana kugwira ntchito.

²⁶Ena asirira modukidwa tsiku lonse; koma wolungama amapatsa osamana.

²⁷Nsembe ya oipa inyansa; makamaka pakudza nayo iwo mwachiwembu.

²⁸Mboni yonama idzafa; koma mwamuna wakumvetsa adzanena mosakayika.

²⁹Munthu woipa aumitsa nkhope yake; koma woongoka mtima akonza njira zake.

³⁰Kulibe nzeru ngakhale luntha ngakhale uphungu wotsutsana ndi Yehova.

³¹Kavalo amakonzedweratu chifukwa cha tsiku la nkhondo; koma wopulumutsa ndiye Yehova.