Read Chichewa Buku Lopatulika Bible 2014 MIYAMBO 22 Bible Online

MIYAMBO 22 - Chichewa Buku Lopatulika Bible 2014 bible

MIYAMBO 22

¹Mbiri yabwino ifunika kopambana chuma chambiri; kukukomera mtima anzako kuposa siliva ndi golide.

²Wolemera ndi wosauka akumana, wolenga onsewo ndiye Yehova.

³Wochenjera aona zoipa, nabisala; koma achibwana angopitirira, nalipitsidwa.

⁴Mphotho ya chifatso ndi kuopa Yehova ndiye chuma, ndi ulemu, ndi moyo.

⁵Minga ndi misampha ili m'njira ya wokhota; koma wosunga moyo wake adzatalikira imeneyo.

⁶Phunzitsa mwana poyamba njira yake; ndipo angakhale atakalamba sadzachokamo.

⁷Wolemera alamulira osauka; ndipo wokongola ndiye kapolo wa womkongoletsa.

⁸Wofesa zosalungama adzakolola tsoka; ndipo nthyole ya mkwiyo wake idzalephera.

⁹Mwini diso lamataya adzadala; pakuti apatsa osauka zakudya zake.

¹⁰Ukainga wonyoza, makangano adzatuluka; makani ndi manyazi adzalekeka.

¹¹Wokonda kuyera mtima, mfumu idzakhala bwenzi lake chifukwa cha chisomo cha milomo yake.

¹²Maso a Yehova atchinjiriza wodziwa; koma agwetsa mau a munthu wa ziwembu.

¹³Waulesi ati, Pali mkango panjapo, ndidzaphedwa pamakwalalapo.

¹⁴M'kamwa mwa mkazi wachiwerewere muli dzenje lakuya; yemwe Yehova amkwiyira adzagwamo.

¹⁵Utsiru umangidwa mumtima mwa mwana; koma nthyole yomlangira idzauingitsira kutali.

¹⁶Wotsendereza waumphawi kuti achulukitse chuma chake, ndi wopatsa wolemera kanthu, angosauka.

¹⁷Tchera makutu ako, numvere mau a anzeru, nulozetse mtima wako kukadziwa zanga.

¹⁸Pakuti mauwo akondweretsa ngati uwasunga m'kati mwako, ngati akhazikika pamodzi pa milomo yako.

¹⁹Ndakudziwitsa amenewo lero, ngakhale iwedi, kuti ukhulupirire Yehova.

²⁰Kodi sindinakulembera zoposa za uphungu ndi nzeru;

²¹kuti ukadziwitse ntheradi yake ya mau oona, nukabwere ndi mau oona kwa iwo amene anakutumiza?

²²Usalande za waumphawi chifukwa ali waumphawi, ngakhale kutsendereza wosauka kubwalo.

²³Pakuti Yehova adzanenera mlandu wao; omwe akwatula zao Iye adzakwatula moyo wao.

²⁴Usayanjane ndi munthu wokwiya msanga; ngakhale kupita ndi mwamuna waukali;

²⁵kuti ungaphunzire mayendedwe ake, ndi kutengera moyo wako msampha.

²⁶Usakhale wodulirana mpherere, ngakhale kumperekera chikole cha ngongole zake.

²⁷Ngati ulibe chobwezera kodi achotserenji kama lako pansi pako?

²⁸Usasunthe chidziwitso chakale cha m'malire, chimene makolo ako anachiimika.

²⁹Kodi upenya munthu wofulumiza ntchito zake? Adzaima pamaso pa mafumu, osaima pamaso pa anthu achabe.