Read Chichewa Buku Lopatulika Bible 2014 MIYAMBO 23 Bible Online

MIYAMBO 23 - Chichewa Buku Lopatulika Bible 2014 bible

MIYAMBO 23

¹Pamene ukhala ulinkudya ndi mkulu, zikumbukira ameneyo ali pamaso pako;

²nuike mpeni pakhosi pako, ngati uli wadyera.

³Usakhumbe zolongosoka zake; pokhala zakudya zonyenga.

⁴Usadzitopetse kuti ulemere; leka nzeru yakoyako.

⁵Kodi upenyeranji chimene kulibe? Pakuti chuma chimera mapiko, ngati mphungu youluka mumlengalenga.

⁶Usadye zakudya zake za wa maso ankhwenzule, ngakhale kukhumba zolongosoka zake.

⁷Pakuti monga asinkha m'kati mwake, ali wotere; ati kwa iwe, Idya numwe; koma mtima wake suli pa iwe.

⁸Pakuti nthongo imene unaidya udzaisanza, ndi kutaya mau ako okondweretsa.

⁹Usalankhule m'makutu a wopusa; pakuti adzapeputsa nzeru ya mau ako.

¹⁰Usasunthe chidziwitso chakale cha m'malire; ngakhale kulowa m'minda ya amasiye;

¹¹pakuti Mombolo wao walimba; adzawanenera mlandu wao pa iwe.

¹²Lozetsa mtima wako kumwambo, ndi makutu ako ku mau anzeru.

¹³Usamane mwana chilango; pakuti ukammenya ndi nthyole safa ai.

¹⁴Udzammenya ndi nthyole, nudzapulumutsa moyo wake kunsi kwa manda.

¹⁵Mwananga, mtima wako ukakhala wanzeru, mtima wanga wa inedi udzakondwa.

¹⁶Imso zanga zidzasangalala, polankhula milomo yako zoongoka.

¹⁷Mtima wako usachitire nsanje akuchimwawo; koma opabe Yehova tsiku lonse.

¹⁸Pakutitu padzakhala mphotho; ndipo chiyembekezo chako sichidzalephereka.

¹⁹Tamvera tsopano, mwananga, utenge nzeru, ulunjikitse mtima wako m'njiramo.

²⁰Usakhale mwa akumwaimwa vinyo, ndi ankhuli osusuka.

²¹Pakuti wakumwaimwa ndi wosusukayo adzasauka; ndipo kusinza kudzaveka munthu nsanza.

²²Tamvera atate wako anakubala, usapeputse amai ako atakalamba.

²³Gula ntheradi, osaigulitsa; nzeru, ndi mwambo, ndi luntha.

²⁴Atate wa wolungama adzasekeradi; wobala mwana wanzeru adzakondwera naye.

²⁵Atate wako ndi amai ako akondwere, amai ako akukubala asekere.

²⁶Mwananga, undipatse mtima wako, maso ako akondwere ndi njira zanga.

²⁷Pakuti mkazi wadama ndiye dzenje lakuya; ndipo mkazi wachiwerewere ndiye mbuna yopapatiza.

²⁸Pakuti abisalira ngati wachifwamba, nachulukitsa anthu a chiwembu.

²⁹Ndani ali ndi chisoni? Ndani asauka? Ndani ali ndi makangano? Ndani ang'ung'udza? Ndani alasidwa chabe? Ndani afiira maso?

³⁰Ngamene achedwa pali vinyo, napita kukafunafuna vinyo wosanganizidwa.

³¹Usayang'ane pavinyo alikufiira, alikung'azimira m'chikho, namweka mosalala.

³²Pa chitsiriziro chake aluma ngati njoka, najompha ngati mamba.

³³Maso ako adzaona zachilendo, mtima wako udzalankhula zokhota.

³⁴Udzafanana ndi wina wogona pakati pa nyanja, pena wogona pa nsonga ya mlongoti wa ngalawa.

³⁵Udzati, Anandimenya, osaphwetekedwa ine; anandikwapula, osamva ine; ndidzauka nthawi yanji? Ndidzafunafunanso vinyoyo.