Read Chichewa Buku Lopatulika Bible 2014 MIYAMBO 24 Bible Online

MIYAMBO 24 - Chichewa Buku Lopatulika Bible 2014 bible

MIYAMBO 24

¹Usachitire nsanje anthu oipa, ngakhale kufuna kukhala nao;

²pakuti mtima wao ulingalira za chionongeko; milomo yao ilankhula za mphulupulu.

³Nzeru imangitsa nyumba; luntha liikhazikitsa.

⁴Kudziwa kudzaza zipinda zake ndi chuma chonse chofunika cha mtengo wake.

⁵Mwamuna wanzeru ngwamphamvu; munthu wodziwa ankabe nalimba.

⁶Pakuti udzaponya nkhondo yako ndi upo, ndi kupulumuka pochuluka aphungu.

⁷Nzeru italikira chitsiru; satsegula pakamwa kubwalo.

⁸Wolingalira zakuchita zoipa anthu adzamtcha wachiwembu.

⁹Maganizo opusa ndiwo tchimo; wonyoza anyansa anthu.

¹⁰Ukalefuka tsiku la tsoka mphamvu yako ichepa.

¹¹Omwe atengedwa kuti akafe, uwapulumutse; omwe ati aphedwe, usaleke kuwalanditsa.

¹²Ukanena, Taonani, sitinadziwa chimenechi; kodi woyesa mitima sachizindikira ichi? Ndi wosunga moyo wako kodi sachidziwa? Ndipo kodi sabwezera munthu yense monga mwa machitidwe ake?

¹³Mwananga, idya uchi pakuti ngwabwino, ndi chisa chake chitsekemera m'kamwa mwako.

¹⁴Potero udzadziwa kuti nzeru ili yotero m'moyo wako; ngati waipeza padzakhala mphotho, ndipo chiyembekezo chako sichidzalephereka.

¹⁵Usabisalire, woipa iwe, pomanga wolungama; usapasule popuma iyepo.

¹⁶Pakuti wolungama amagwa kasanu ndi kawiri, nanyamukanso; koma oipa akhumudwa pomfikira tsoka.

¹⁷Usakondwere pakugwa mdani wako; mtima wako usasekere pokhumudwa iye;

¹⁸kuti Yehova angaone kukondwa kwako, ndi kukuyesa koipa, ndi kuleka kumkwiyira.

¹⁹Usavutike mtima chifukwa cha ochita zoipa; ngakhale kuchitira nsanje amphulupulu.

²⁰Pakuti woipayo sadzalandira mphotho; nyali ya amphulupulu idzazima.

²¹Mwananga, opa Yehova ndi mfumu yomwe, osadudukira anthu osinthasintha.

²²Pakuti tsoka lao lidzaoneka modzidzimuka; ndipo ndani adziwa chionongeko cha zaka zao?

²³Izinso zili za anzeru, poweruza chetera silili labwino.

²⁴Wonena kwa woipa, Wolungama iwe; magulu a anthu adzamtemberera, mitundu ya anthu idzamkwiyira.

²⁵Omwe amdzudzula adzasekera, nadzadalitsika ndithu.

²⁶Wobwezera mau oongoka apsompsona milomo.

²⁷Longosola ntchito yako panjapo, nuikonzeretu kumunda; pambuyo pake ndi kumanga nyumba yako.

²⁸Usachitire mnzako umboni womtsutsa opanda chifukwa; kodi udzanyenga ndi milomo yako?

²⁹Usanene, Ndidzamchitira zomwezo anandichitira ine ndidzabwereza munthuyo monga mwa machitidwe ake.

³⁰Ndinapita pa munda wa waulesi, polima mphesa munthu wosowa nzeru.

³¹Taonani, ponsepo panamera minga, ndi kuwirirapo khwisa; tchinga lake lamiyala ndi kupasuka.

³²Pamenepo ndinayang'ana ndi kuganizira, ndinaona ndi kulandira mwambo.

³³Tulo tapang'ono, kungoodzera pang'ono, kungomanga manja pang'ono m'kugona,

³⁴ndipo umphawi wako udzafika ngati mbala; ndi kusauka kwako ngati munthu wachikopa.