Read Chichewa Buku Lopatulika Bible 2014 MIYAMBO 25 Bible Online

MIYAMBO 25 - Chichewa Buku Lopatulika Bible 2014 bible

MIYAMBO 25

¹Iyinso ndiyo miyambo ya Solomoni imene anthu a Hezekiya mfumu ya Yuda anailemba.

²Kubisa kanthu ndi ulemerero wa Mulungu; koma ulemerero wa mafumu ndi kusanthula kanthu.

³Pamlengalenga patalika, ndi padziko pakuya, koma mitima ya mafumu singasanthulike.

⁴Chotsera siliva mphala yake, mmisiri wa ng'anjo atulutsamo mbale.

⁵Chotsera woipa pamaso pa mfumu, mpando wake udzakhazikika m'chilungamo.

⁶Usadzitame pamaso pa mfumu, ngakhale kuima m'malo mwa akulu.

⁷Pakuti kunena kwa iwe, Takwera kuno, kupambana ndi kuti utsitsidwe pamaso pa kalonga, amene maso ako anamuona.

⁸Usatuluke mwansontho kukalimbana, ungalephere pa kutha kwake, atakuchititsa mnzako manyazi.

⁹Nena mlandu wako ndi mnzako, osawulula zinsinsi za mwini;

¹⁰kuti wakumva angakutonze, mbiri yako yoipa ndi kusachoka.

¹¹Mau oyenera a pa nthawi yake akunga zipatso zagolide m'nsengwa zasiliva.

¹²Monga mphete yagolide ndi chipini chagolide woyengeka, momwemo wanzeru wodzudzula pa khutu lomvera.

¹³Monga chisanu cha chipale chofewa pa nthawi ya masika, momwemo mthenga wokhulupirika kwa amene anamtuma; atsitsimutsa moyo wa ambuyake.

¹⁴Monga mitambo ndi mphepo popanda mvula, momwemo ndiye wodzikweza ndi zipatso zake monyenga.

¹⁵Chipiriro chipembedza mkulu; lilime lofatsa lithyola fupa.

¹⁶Wapeza uchi kodi? Idyapo wokwanira, kuti ungakukole, nusanze.

¹⁷Phazi lako lilowe m'nyumba ya mnzako kamodzikamodzi; kuti angatope nawe ndi kukuda.

¹⁸Wochitira mnzake umboni wonama ndiye chibonga, ndi lupanga, ndi muvi wakuthwa.

¹⁹Kukhulupirira munthu wa chiwembu tsiku latsoka kunga dzino lothyoka ndi phazi loguluka.

²⁰Monga wovula malaya tsiku lamphepo, ngakhale kuthira vinyo wosasa m'soda, momwemo woimbira nyimbo munthu wachisoni.

²¹Mdani wako akamva njala umdyetse, akamva ludzu ummwetse madzi.

²²Pakuti udzaunjika makala amoto pamtu pake; ndipo Yehova adzakupatsa mphotho.

²³Mphepo ya kumpoto ifikitsa mvula; chomwecho lilime losinjirira likwiyitsa nkhope.

²⁴Kukhala pangodya ya tsindwi kufunika kuposa kukhala m'nyumba ndi mkazi wolongolola.

²⁵Monga madzi ozizira kwa munthu wotopa, momwemo mau abwino akuchokera kudziko lakutali.

²⁶Monga kasupe wopondedwa, ndi chitsime choonongeka, momwemo wolungama ngati agonjera woipa.

²⁷Kudya uchi wambiri sikuli kwabwino; chomwecho kufunafuna ulemu wakowako sikuli ulemu.

²⁸Wosalamulira mtima wake akunga mudzi wopasuka wopanda linga.