Read Chichewa Buku Lopatulika Bible 2014 MIYAMBO 27 Bible Online

MIYAMBO 27 - Chichewa Buku Lopatulika Bible 2014 bible

MIYAMBO 27

¹Usanyadire zamawa, popeza sudziwa tsiku lina lidzabala chiyani?

²Wina akutume, si m'kamwa mwako ai; mlendo, si milomo ya iwe wekha.

³Mwala ulemera, mchenga ndiwo katundu; koma mkwiyo wa chitsiru upambana kulemera kwake.

⁴Kupweteka mtima nkwa nkhanza, mkwiyo usefuka; koma ndani angalakike ndi nsanje?

⁵Chidzudzulo chomveka chiposa chikondi chobisika.

⁶Kulasa kwa bwenzi kuli kokhulupirika; koma mdani apsompsona kawirikawiri.

⁷Mtima wokhuta upondereza chisa cha uchi; koma wakumva njala ayesa zowawa zonse zotsekemera.

⁸Monga mbalame yosochera kuchisa chake, momwemo munthu wosochera kumalo ake.

⁹Mafuta ndi zonunkhira zikondweretsa mtima, ndi ubwino wa bwenzi uteronso pakupangira uphungu.

¹⁰Mnzako, ndi mnzake wa atate wako, usawasiye; usanke kunyumba ya mbale wako tsiku la tsoka lako; mnansi wapafupi aposa mbale wakutali.

¹¹Mwananga, khala wanzeru, nukondweretse mtima wanga; kuti ndimuyankhe yemwe anditonza.

¹²Wochenjera aona zoipa, nabisala; koma achibwana angopitirira, nalipitsidwa.

¹³Tenga malaya a woperekera mlendo chikole; woperekera mkazi wachiwerewere chikole umgwire mwini.

¹⁴Yemwe adalitsa mnzake ndi mau akulu pouka mamawa, anthu adzachiyesa chimenecho temberero.

¹⁵Kudonthadontha tsiku lamvula, ndi mkazi wolongolola ali amodzimodzi.

¹⁶Wofuna kumletsayo afuna kuletsa mphepo; dzanja lake lamanja lingogwira mafuta.

¹⁷Chitsulo chinola chitsulo; chomwecho munthu anola nkhope ya mnzake.

¹⁸Wosunga mkuyu adzadya zipatso zake; wosamalira ambuyake adzalemekezedwa.

¹⁹Monga m'madzi nkhope zionana, momwemo mitima ya anthu idziwana.

²⁰Kunsi kwa manda ndi kuchionongeko sikukhuta; ngakhale maso a munthu sakhutai.

²¹Siliva asungunuka m'mbiya, ndi golide m'ng'anjo, motero chomwe munthu achitama adziwika nacho.

²²Ungakhale ukonola chitsiru m'mtondo ndi munsi, pamodzi ndi mphale, koma utsiru wake sudzamchoka.

²³Udziwitsitse zoweta zako zili bwanji, samalira magulu ako;

²⁴pakuti chuma sichili chosatha; kodi korona alipobe mpaka mibadwomibadwo.

²⁵Amatuta udzu, msipu uoneka, atchera masamba a kumapiri.

²⁶Anaankhosa akuveka, atonde aombolera munda;

²⁷mkaka wa mbuzi udzakukwanira kudya; ndi a pa banja lako ndi adzakazi ako.