Read Chichewa Buku Lopatulika Bible 2014 MIYAMBO 28 Bible Online

MIYAMBO 28 - Chichewa Buku Lopatulika Bible 2014 bible

MIYAMBO 28

¹Woipa athawa palibe momthamangitsa; koma olungama alimba mtima ngati mkango.

²Pochimwa dziko akalonga ake achuluka; koma anthu ozindikira ndi odziwa alikhazikikitsa nthawi yaikulu.

³Munthu waumphawi wotsendereza osauka akunga mvula yamadzi yokokolola dzinthu.

⁴Omwe asiya chilamulo atama oipa; koma omwe asunga chilamulo akangana nao.

⁵Oipa samvetsetsa chiweruzo; koma omwe afuna Yehova amvetsetsa zonse.

⁶Waumphawi woyenda mwangwiro apambana ndi yemwe akhotetsa njira zake, angakhale alemera.

⁷Wosunga chilamulo ndiye mwana wozindikira; koma mnzao wa adyera achititsa atate wake manyazi.

⁸Wochulukitsa chuma chake, pokongoletsa ndi phindu, angokundikira yemwe achitira osauka chisoni.

⁹Wopewetsa khutu lake kuti asamve chilamulo, ngakhale pemphero lake linyansa.

¹⁰Wosocheretsa oongoka mtima alowe m'njira yoipa, adzagwa mwini m'dzenje lake; koma angwiro adzalandira cholowa chabwino.

¹¹Wolemera adziyesa wanzeru; koma wosauka wozindikira aululitsa zake.

¹²Posekera olungama pali ulemerero wambiri; koma pouka oipa anthu amabisala.

¹³Wobisa machimo ake sadzaona mwai; koma wakuwavomereza, nawasiya adzachitidwa chifundo.

¹⁴Wodala munthu wakuopa kosalekeza; koma woumitsa mtima wake adzagwa m'zoipa.

¹⁵Monga mkango wobangula ndi chilombo choyendayenda, momwemo mfumu yoipa ya anthu osauka.

¹⁶Kalonga wosowa nzeru apambana kusautsa; koma yemwe ada chisiriro adzatanimphitsa moyo wake.

¹⁷Wopalamula mlandu wakupha munthu adzathawira kudzenje; asamuletse.

¹⁸Woyenda mwangwiro adzapulumuka; koma wokhota m'mayendedwe ake adzagwa posachedwa.

¹⁹Wolima munda wake zakudya zidzamkwanira; koma wotsata anthu opanda pake umphawi udzamkwanira.

²⁰Munthu wokhulupirika ali ndi madalitso ambiri; koma wokangaza kulemera sadzapulumuka chilango.

²¹Chetera silili labwino, ngakhale kulakwa kuti ukadye kanthu.

²²Mwini diso lankhwenzule akangaza kulemera, osadziwa kuti umphawi udzamfikira.

²³Adzamkomera mtima wodzudzula m'tsogolo mwake, koposa wosyasyalika ndi lilime lake.

²⁴Wobera atate wake, pena amake, nati, Palibe kulakwa; ndiye mnzake wa munthu wopasula.

²⁵Wodukidwa mtima aputa makangano; koma wokhulupirira Yehova adzakula.

²⁶Wokhulupirira mtima wakewake ali wopusa; koma woyenda mwanzeru adzapulumuka.

²⁷Wogawira aumphawi sadzasowa; koma wophimba maso ake adzatembereredwa kwambiri.

²⁸Pouka oipa anthu amabisala; koma pakufa amenewo olungama achuluka.