Read Chichewa Buku Lopatulika Bible 2014 MIYAMBO 29 Bible Online

MIYAMBO 29 - Chichewa Buku Lopatulika Bible 2014 bible

MIYAMBO 29

¹Yemwe aumitsa khosi atadzudzulidwa kwambiri, adzasweka modzidzimuka, palibe chomchiritsa.

²Pochuluka olungama anthu akondwa; koma polamulira woipa anthu ausa moyo.

³Mwamuna wokonda nzeru akondweretsa atate wake; koma wotsagana ndi akazi adama amwaza chuma.

⁴Mfumu akhazikitsa dziko ndi chiweruzo; koma wosonkhetsa anthu mphatso alipululutsa.

⁵Wosyasyalika mnzake atcherera mapazi ake ukonde.

⁶M'kulakwa kwa woipa muli msampha; koma wolungama aimba, nakondwera.

⁷Wolungama asamalira mlandu wa osauka; koma woipa alibe nzeru yakuudziwa.

⁸Anthu onyoza atentha mudzi; koma anzeru alezetsa mkwiyo.

⁹Munthu wanzeru akatsutsana ndi munthu wopusa, ngakhale akwiya, ngakhale aseka, palibe mtendere.

¹⁰Anthu ankhanza ada wangwiro; koma oongoka mtima asamalira moyo wake.

¹¹Chitsiru chivumbulutsa mkwiyo wake wonse; koma wanzeru auletsa nautontholetsa.

¹²Mkulu akamvera chinyengo, atumiki ake onse ali oipa.

¹³Waumphawi ndi wotsendereza akumana; Yehova apenyetsa maso a onse awiriwo.

¹⁴Mfumu yolamulira osauka mwantheradi, mpando wake udzakhazikika kufikira nthawi zonse.

¹⁵Nthyole ndi chidzudzulo zipatsa nzeru; koma mwana womlekerera achititsa amake manyazi.

¹⁶Pochuluka oipa zolakwa zichuluka; koma olungama adzaona kugwa kwao.

¹⁷Langiza mwana wako, ndipo adzakupumitsa; nadzasangalatsa moyo wako.

¹⁸Popanda chivumbulutso anthu amasauka; koma wosunga chilamulo adalitsika.

¹⁹Kapolo sangalangizidwe ndi mau, pakuti azindikira koma osavomera.

²⁰Kodi uona munthu wansontho m'mau ake? Ngakhale chitsiru chidzachenjera, koma ameneyo ai.

²¹Yemwe alera kapolo wake mwa ufulu kuyambira ubwana wake, pambuyo pake adzadziyesa mwana wobala.

²²Mwamuna wamkwiyo aputa makangano; waukali achuluka zolakwa.

²³Kudzikuza kwa munthu kudzamchepetsa; koma wokhala ndi mtima wodzichepetsa adzalemekezedwa.

²⁴Woyenda ndi mbala ada moyo wakewake; amva kulumbira, koma osawulula kanthu.

²⁵Kuopa anthu kutchera msampha; koma wokhulupirira Yehova adzapulumuka.

²⁶Ambiri afunafuna chiyanjano cha mkulu; koma chiweruzo cha munthu chichokera kwa Yehova.

²⁷Munthu woipa anyansa olungama; ndipo woongoka m'njira anyansa wochimwa.