Read Chichewa Buku Lopatulika Bible 2014 MIYAMBO 30 Bible Online

MIYAMBO 30 - Chichewa Buku Lopatulika Bible 2014 bible

MIYAMBO 30

¹Mau a Aguri mwana wa Yake; uthenga. Munthuyo anati, Ndadzitopetsa, Mulungu; ndadzitopetsa, Mulungu, ndathedwa;

²pakuti ndipambana anthu onse kupulukira, ndilibe luntha la munthu.

³Sindinaphunzira nzeru ngakhale kudziwa Woyerayo.

⁴Ndani anakwera kumwamba natsikanso? Ndani wakundika nafumbata mphepo? Ndani wamanga madzi m'malaya ake? Ndani wakhazikitsa matsiriziro onse a dziko? Dzina lake ndani? Dzina la mwanake ndani? Kapena udziwa.

⁵Mau onse a Mulungu ali oyengeka; ndiye chikopa cha iwo amene amkhulupirira.

⁶Usaonjezere kanthu pa mau ake, angakudzudzule, nungatsutsidwe kuti ulikunama.

⁷Zinthu ziwiri ndakupemphani, musandimane izo ndisanamwalire:

⁸Mundichotsere kutali zachabe ndi mabodza; musandipatse umphawi, ngakhale chuma, mundidyetse zakudya zondiyenera;

⁹ndingakhute ndi kukukanani, ndi kuti, Yehova ndani? Kapena ndingasauke ndi kuba, ndi kutchula dzina la Mulungu wanga pachabe.

¹⁰Usanamizire kapolo kwa mbuyake, kuti angakutemberere nawe ndi kutsutsidwa.

¹¹Pali mbadwo wotemberera atate ao, osadalitsa amai ao.

¹²Pali mbadwo wodziyesa oyera, koma osasamba litsiro lao.

¹³Pali mbadwo wokwezatu maso ao, zikope zao ndi kutukula.

¹⁴Pali mbadwo mano ao akunga malupanga, zibwano zao zikunga mipeni; kuti adye osauka kuwachotsa kudziko, ndi aumphawi kuwachotsa mwa anthu.

¹⁵Msundu uli ndi ana akazi awiri ati, Patsa, patsa. Pali zinthu zitatu sizikhuta konse, ngakhale zinai sizinena, Kwatha:

¹⁶Manda, ndi chumba, dziko losakhuta madzi, ndi moto wosanena, Kwatha.

¹⁷Diso lochitira atate wake chiphwete, ndi kunyoza kumvera amake, makungubwi a kumtsinje adzalikolowola, ana a mphungu adzalidya.

¹⁸Zinthu zitatu zindithetsa nzeru, ngakhale zinai, sindizidziwa:

¹⁹Njira ya mphungu m'mlengalenga, njira ya njoka pamwala, njira ya ngalawa pakati pa nyanja, njira ya mwamuna ndi namwali.

²⁰Chomwecho njira ya mkazi wachigololo; adya, napukuta pakamwa, nati, Sindinachita zoipa.

²¹Chifukwa cha zinthu zitatu dziko linthunthumira; ngakhale chifukwa cha zinai silingathe kupirira nazo;

²²chifukwa cha kapolo pamene ali mfumu; ndi chitsiru chitakhuta zakudya;

²³chifukwa cha mkazi wodedwa wokwatidwa; ndi mdzakazi amene adzalandira cholowa cha mbuyake.

²⁴Zilipo zinai zili zazing'ono padziko; koma zipambana kukhala zanzeru:

²⁵Nyerere ndi mtundu wosalimba, koma zitengeratu zakudya zao m'malimwe.

²⁶Mbira ndi mtundu wopanda mphamvu, koma ziika nyumba zao m'matanthwe.

²⁷Dzombe lilibe mfumu, koma lituluka lonse mabwalomabwalo.

²⁸Buluzi ungamgwire m'manja, koma ali m'nyumba za mafumu.

²⁹Pali zinthu zitatu ziyenda chinyachinya; ngakhale zinai ziyenda mwaufulu:

³⁰Mkango umene uposa zilombo kulimba, supatukira chinthu chilichonse;

³¹tambala wolimba m'chuuno, ndi tonde, ndi mfumu yokhala ndi ankhondo ake.

³²Ngati wapusa podzikweza, ngakhale kuganizira zoipa, tagwira pakamwa.

³³Pakuti potakasa mkaka, mafuta ayengekapo; ndi popsinja mfuno, mwazi utulukamo, ndi polimbikira mkwiyo ndeu ionekamo.