Read Chichewa Buku Lopatulika Bible 2014 MIYAMBO 31 Bible Online

MIYAMBO 31 - Chichewa Buku Lopatulika Bible 2014 bible

MIYAMBO 31

¹Mau a Lemuwele mfumu, uthenga umene amake anamphunzitsa.

²Chiyani mwananga, Chiyani mwana wa mimba yanga? Chiyani mwana wa zowinda zanga?

³Musapereke mphamvu yako kwa akazi, ngakhale kuyenda m'njira yoononga mafumu.

⁴Mafumu, Lemuwele, mafumu sayenera kumwa vinyo; akalonga sayenera kunena, Chakumwa chaukali chili kuti?

⁵Kuti angamwe, naiwale malamulo, naweruze mokhota anthu onse osautsidwa.

⁶Wofuna kufa umpatse chakumwa chaukali, ndi vinyo kwa owawa mtima;

⁷amwe, naiwale umphawi wake, osakumbukiranso vuto lake.

⁸Tsegula pakamwa pako, ukanenere wosalankhula, ndi mlandu wa amasiye onse.

⁹Tsegula pakamwa pako nuweruze molungama, nunenere osauka ndi aumphawi.

¹⁰Mkazi wangwiro ndani angampeze? Pakuti mtengo wake uposa ngale.

¹¹Mtima wa mwamuna wake umkhulupirira, sadzasowa phindu.

¹²Mkaziyo amchitira zabwino, si zoipa, masiku onse a moyo wake.

¹³Afuna ubweya ndi thonje, nachita mofunitsa ndi manja ake.

¹⁴Akunga zombo za malonda; nakatenga zakudya zake kutali.

¹⁵Aukanso kusanake, napatsa banja lake zakudya, nagawira adzakazi ake ntchito.

¹⁶Asinkhasinkha za munda, naugula; naoka mipesa ndi zipatso za manja ake.

¹⁷Amanga m'chuuno mwake ndi mphamvu, nalimbitsa mikono yake.

¹⁸Azindikira kuti malonda ake ampindulira; nyali yake sizima usiku.

¹⁹Agwira njinga ya thonje ndi dzanja lake, nafumbata mtengo wake.

²⁰Aolowera chikhato chake osauka; natambasulira aumphawi manja ake.

²¹Saopera banja lake chipale chofewa; pakuti banja lake lonse livala mlangali.

²²Adzipangira zimbwi zamawangamawanga; navala bafuta ndi guta wofiirira.

²³Mwamuna wake adziwika kubwalo, pokhala pakati pa akulu a dziko.

²⁴Asoka malaya abafuta, nawagulitsa; napereka mipango kwa ogulitsa malonda.

²⁵Avala mphamvu ndi ulemu; nangoseka nthawi ya m'tsogolo.

²⁶Atsegula pakamwa pake ndi nzeru, ndipo chilangizo cha chifundo chili pa lilime lake.

²⁷Ayang'anira mayendedwe a banja lake, sadya zakudya za ulesi.

²⁸Anake adzanyamuka, nadzamutcha wodala; mwamuna wake namtama, nati,

²⁹Ana akazi ambiri anachita mwangwiro, koma iwe uposa onsewo.

³⁰Kukongola kungonyenga, maonekedwe okoma ndi chabe; koma mkazi woopa Yehova adzatamandidwa.

³¹Mumpatse zipatso za manja ake; ndi ntchito zake zimtame kubwalo.