Read Chichewa Buku Lopatulika Bible 2014 MIYAMBO 5 Bible Online

MIYAMBO 5 - Chichewa Buku Lopatulika Bible 2014 bible

MIYAMBO 5

¹Mwananga, mvera nzeru yanga; tcherera makutu ku luntha langa;

²ukasunge zolingalira, milomo yako ilabadire zomwe udziwa.

³Pakuti milomo ya mkazi wachiwerewere ikukha uchi; m'kamwa mwake muti see koposa mafuta.

⁴Chimaliziro chake nchowawa ngati chivumulo, ndi chakuthwa ngati lupanga lakuthawa konsekonse.

⁵Mayendedwe ake atsikira kuimfa; mapazi ake aumirira kumanda;

⁶sasinkhasinkha bwino za njira ya moyo; mayendedwe ake adzandira dzandidzandi osadziwa iye.

⁷Ndipo tsopano ana, mundimvere, musapatuke ku mau a m'kamwa mwanga.

⁸Siyanitsa njira yako kutali kwa iyeyo, osayandikira ku khomo la nyumba yake;

⁹kuti ungapereke ulemu wako kwa ena, ndi zaka zako kwa ankhanza;

¹⁰kuti mphamvu yako isakhutitse alendo, ndi kuti usagwire ntchito m'nyumba ya wachilendo;

¹¹ungalire pa chimaliziro chako, pothera nyama yako ndi thupi lako;

¹²ndi kuti, Bwanji ndinada mwambo, mtima wanga ndi kunyoza chidzudzulo;

¹³ndipo sindinamvera mau a aphunzitsi anga; ngakhale kutcherera makutu kwa akundilanga mwambo!

¹⁴Ndikadakhala m'zoipa zonse, m'kati mwa msonkhano ndi khamu la anthu.

¹⁵Imwa madzi a m'chitsime mwako, ndi madzi oyenda a m'kasupe mwako.

¹⁶Kodi magwero ako ayenera kumwazika kunja, ndi mitsinje ya madzi m'makwalala?

¹⁷Ikhale ya iwe wekha, si ya alendo okhala nawe ai.

¹⁸Adalitsike kasupe wako; ukondwere ndi mkazi wokula nayo.

¹⁹Ngati mbawala yokonda ndi chinkhoma chachisomo, maere ake akukwanire nthawi zonse; ukodwe ndi chikondi chake osaleka.

²⁰Pakuti ukondwerenji, mwananga, ndi mkazi wachiwerewere, ndi kufungatira chifuwa cha mkazi wachilendo?

²¹Pakuti njira za munthu zili pamaso pa Yehova, asinkhasinkha za mayendedwe ake onse.

²²Zoipa zakezake zidzagwira woipa; adzamangidwa ndi zingwe za uchimo wake.

²³Adzafa posowa mwambo; adzasochera popusa kwambiri.