Read Chichewa Buku Lopatulika Bible 2014 MIYAMBO 6 Bible Online

MIYAMBO 6 - Chichewa Buku Lopatulika Bible 2014 bible

MIYAMBO 6

¹Mwananga, ngati waperekera mnzako chikole, ngati wapangana kulipirira mlendo,

²wakodwa ndi mau a m'kamwa mwako, wagwidwa ndi mau a m'kamwa mwako.

³Chita ichi tsono; mwananga, nudzipulumutse; popeza walowa m'dzanja la mnzako, pita nudzichepetse, numdandaulire mnzako.

⁴Usaone tulo m'maso mwako, ngakhale kuodzera zikope zako.

⁵Dzipulumutse wekha ngati mphoyo kudzanja la msaki, ndi mbalame kudzanja la msodzi.

⁶Pita kunyerere, waulesi iwe, penya njira zao nuchenjere;

⁷zilibe mfumu, ngakhale kapitao, ngakhale mkulu;

⁸koma zitengeratu zakudya zao m'malimwe; nizituta dzinthu zao m'masika.

⁹Udzagona mpaka liti, waulesi iwe? Udzauka kutulo tako liti?

¹⁰Tulo ta pang'ono, kuodzera pang'ono, kungomanga manja pang'ono, ndi kugona;

¹¹ndipo umphawi wako udzafika ngati mbala, ndi kusauka kwako ngati munthu wachikopa.

¹²Munthu wopanda pake, mwamuna wamphulupulu; amayenda ndi m'kamwa mokhota.

¹³Amatsinzinira ndi maso ake, napalasira ndi mapazi ake, amalankhula ndi zala zake;

¹⁴zopotoka zili m'mtima mwake, amaganizira zoipa osaleka; amapikisanitsa anthu.

¹⁵Chifukwa chake tsoka lake lidzadza modzidzimuka; adzasweka msangamsanga, palibe chompulumutsa.

¹⁶Zilipo zinthu zisanu ndi chimodzi Yehova azida; ngakhale zisanu ndi ziwiri zimnyansa:

¹⁷Maso akunyada, lilime lonama, ndi manja akupha anthu osachimwa;

¹⁸mtima woganizira ziwembu zoipa, mapazi akuthamangira mphulupulu m'mangum'mangu;

¹⁹mboni yonama yonong'ona mabodza, ndi wopikisanitsa abale.

²⁰Mwananga, sunga malangizo a atate wako, usasiye malamulo a mai ako;

²¹uwamange pamtima pako osaleka; uwalunze pakhosi pako.

²²Adzakutsogolera ulikuyenda, ndi kukudikira uli m'tulo, ndi kulankhula nawe utauka.

²³Pakuti malangizo ndi nyali, malamulo ndi kuunika; ndi zidzudzulo za mwambo ndizo njira ya moyo.

²⁴Zikutchinjiriza kwa mkazi woipa, ndi kulilime losyasyalika la mkazi wachiwerewere.

²⁵Asakuchititse kaso m'mtima mwako, asakukole ndi zikope zake.

²⁶Pakuti ukayamba ndi mkazi wadama, udzamaliza ndi nyenyeswa; ndipo mkazi wa mwini amasaka moyo wa mtengo wapatali.

²⁷Kodi mwamuna angatenge moto pa chifuwa chake, osatentha zovala zake?

²⁸Pena kodi mwamuna angayende pa makala oyaka, osapsa mapazi ake?

²⁹Chomwecho wolowa kwa mkazi wa mnzake; womkhudzayo sadzapulumuka chilango.

³⁰Anthu sanyoza mbala ikaba, kuti ikhutitse mtima wake pomva njala;

³¹koma ikapezedwa idzabwezera kasanu ndi kawiri; idzapereka chuma chonse cha m'nyumba yake.

³²Wochita chigololo ndi mkazi alibe nzeru; wofuna kuononga moyo wakewake ndiye amatero.

³³Adzalasidwa nanyozedwa; chitonzo chake sichidzafafanizidwa.

³⁴Pakuti nsanje ndiyo ukali wa mwamuna, ndipo sadzachitira chifundo tsiku lobwezera chilango.

³⁵Sadzalabadira chiombolo chilichonse, sadzapembedzeka ngakhale uchulukitsa malipo.