Read Chichewa Buku Lopatulika Bible 2014 MIYAMBO 7 Bible Online

MIYAMBO 7 - Chichewa Buku Lopatulika Bible 2014 bible

MIYAMBO 7

¹Mwananga, sunga mau anga, ukundike malangizo anga,

²Sunga malangizo anga, nukhale ndi moyo; ndi malamulo anga ngati mwana wa diso lako.

³Uwamange pa zala zako, uwalembe pamtima pako.

⁴Nena kwa nzeru, Ndiwe mlongo wanga; nutche luntha mbale wako.

⁵Kuti zikutchinjirizire kwa mkazi wachiwerewere, kwa mlendo wamkazi wosyasyalika ndi mau ake.

⁶Pakuti pa zenera la nyumba yanga ndinapenyera pamwamba pake; ndinaona pakati pa achibwana,

⁷ndinazindikira pakati pa ang'ono mnyamata wopanda nzeru,

⁸alikupita pakhwalala pafupi ndi mphambano ya pa mkaziyo, ndi kuyenda pa njira ya kunyumba yake;

⁹pa madzulo kuli sisiro, pakati pa usiku pali mdima.

¹⁰Ndipo taona, mkaziyo anamchingamira, atavala zadama wochenjera mtima,

¹¹ali wolongolola ndi wosaweruzika, mapazi ake samakhala m'nyumba mwake.

¹²Mwina ali kumakwalala, mwina ali kumabwalo, nabisalira pa mphambano zonse.

¹³Ndipo anagwira mnyamatayo, nampsompsona; nati kwa iye ndi nkhope yachipongwe,

¹⁴nsembe zamtendere zili nane; lero ndachita zowinda zanga.

¹⁵Chifukwa chake ndatuluka kudzakuchingamira, kudzafunitsa nkhope yako, ndipo ndakupeza.

¹⁶Ndayala zofunda pakama panga, nsalu zamawangamawanga za thonje la ku Ejipito,

¹⁷ndakapiza pamphasa panga mankhwala onunkhira a mure ndi chisiyo ndi sinamoni.

¹⁸Tiye tikondwere ndi chikondano mpaka mamawa; tidzisangalatse ndi chiyanjano.

¹⁹Pakuti mwamuna kulibe kwathu, wapita ulendo wa kutali;

²⁰watenga thumba la ndalama m'dzanja lake, tsiku lowala mwezi adzabwera kwathu.

²¹Amkakamiza ndi kukoka kwa mau ake, ampatutsa ndi kusyasyalika kwa milomo yake.

²²Mnyamatayo amtsata posachedwa, monga ng'ombe ipita kukaphedwa; ndi monga unyolo umadza kulanga chitsiru;

²³mpaka muvi ukapyoza mphafa yake; amtsata monga mbalame yothamangira msampha; osadziwa kuti adzaononga moyo wake.

²⁴Ndipo tsopano, ananga, mundimvere ine, labadirani mau a m'kamwa mwanga.

²⁵Mtima wako usapatukire kunjira ya mkaziyo, usasochere m'mayendedwe ake.

²⁶Pakuti amagwetsa ambiri, atawalasa; ndipo ophedwa ndi iye achulukadi.

²⁷Nyumba yake ndiyo njira ya kumanda, yotsikira kuzipinda za imfa.