Read Chichewa Buku Lopatulika Bible 2014 MIYAMBO 8 Bible Online

MIYAMBO 8 - Chichewa Buku Lopatulika Bible 2014 bible

MIYAMBO 8

¹Kodi nzeru siitana, luntha ndi kukweza mau ake?

²Iima pamwamba pa mtunda, pa mphambano za makwalala;

³pambali pa chipata polowera m'mudzi, polowa anthu pa makomo ifuula:

⁴Ndinu ndikuitanani, amuna, mau anga ndilankhula kwa ana a anthu.

⁵Achibwana inu, chenjerani, opusa inu, khalani ndi mtima wozindikira;

⁶imvani, pakuti ndikanena zoposa, ndi zolungama potsegula pakamwa panga.

⁷Pakuti m'kamwa mwanga mudzalankhula ntheradi, zoipa zinyansa milomo yanga.

⁸Mau onse a m'kamwa mwanga alungama; mwa iwo mulibe zokhota ndi zopotoka.

⁹Onsewo amveka ndi iye amene azindikira; alungama kwa akupeza nzeru.

¹⁰Landirani mwambo wanga, si siliva ai; ndi nzeru kopambana ndi golide wosankhika.

¹¹Pakuti nzeru iposa ngale, ndi zonse tizifunitsa sizilingana nayo.

¹²Ine Nzeru ndikhala m'kuchenjera, ngati m'nyumba yanga; ndimapeza kudziwa ndi zolingalira.

¹³Kuopa Yehova ndiko kuda zoipa; kunyada, ndi kudzikuza, ndi njira yoipa, ndi m'kamwa mokhota, ndizida.

¹⁴Ndine mwini uphungu ndi kudziwitsa; ndine luntha; ndili ndi mphamvu.

¹⁵Mwa ine mafumu alamulira; akazembe naweruza molungama.

¹⁶Mwa ine akalonga ayang'anira, ndi akulu, ngakhale oweruza onse a m'dziko.

¹⁷Akundikonda ndiwakonda; akundifunafuna adzandipeza.

¹⁸Katundu ndi ulemu zili ndi ine, chuma chosatha ndi chilungamo.

¹⁹Chipatso changa chiposa golide, ngakhale golide woyengeka; phindu langa liposa siliva wosankhika.

²⁰Ndimayenda m'njira ya chilungamo, pakati pa mayendedwe a chiweruzo,

²¹kuti ndionetse chuma akundikonda, chikhale cholowa chao, ndi kudzaza mosungira mwao.

²²Yehova anali nane poyamba njira yake, asanalenge zake zakale.

²³Anandiimika chikhalire chiyambire, dziko lisanalengedwe.

²⁴Pamene panalibe zozama ndinabadwa ine, pamene panalibe akasupe odzala madzi.

²⁵Mapiri asanakhazikike, zitunda zisanapangidwe, ndinabadwa.

²⁶Asanalenge dziko, ndi thengo, ngakhale chiyambi cha fumbi la dziko.

²⁷Pamene anakhazika mlengalenga ndinali pompo; pamene analemba pazozama kwetekwete;

²⁸polimbitsa Iye thambo la kumwamba, pokula akasupe a zozama.

²⁹Poikira nyanja malire ake, kuti madzi asapitirire pa lamulo lake; polemba maziko a dziko.

³⁰Ndinali pa mbali pake ngati mmisiri; ndinamsekeretsa tsiku ndi tsiku, ndi kukondwera pamaso pake nthawi zonse;

³¹ndi kukondwera ndi dziko lake lokhalamo anthu, ndi kusekerera ndi ana a anthu.

³²Ndipo tsopano, ananga, mundimvere ine, ngodala akusunga njira zanga.

³³Imvani mwambo, mukhale anzeru osaukana.

³⁴Ngwodala amene andimvera, nadikira pa zitseko zanga tsiku ndi tsiku, ndi kulinda pa mphuthu za makoma anga;

³⁵pakuti wondipeza ine apeza moyo; Yehova adzamkomera mtima.

³⁶Koma wondichimwira apweteka moyo wake; onse akundida ine akonda imfa.