Read Chichewa Buku Lopatulika Bible 2014 MIYAMBO 9 Bible Online

MIYAMBO 9 - Chichewa Buku Lopatulika Bible 2014 bible

MIYAMBO 9

¹Nzeru yamanga nyumba yake, yasema zoimiritsa zake zisanu ndi ziwiri;

²yaphera nyama yake, nisanganiza vinyo wake, nilongosolanso pa gome lake.

³Yatuma anamwali ake, iitana pa misanje ya m'mudzi.

⁴Wazibwana yense apatukire kuno; iti kwa yense wosowa nzeru,

⁵Tiyeni, idyani chakudya changa; nimumwe vinyo wanga ndamsanganiza.

⁶Lekani, achibwana inu, nimukhale ndi moyo; nimuyende m'njira ya nzeru.

⁷Woweruza munthu wonyoza adzichititsa yekha manyazi; yemwe adzudzula wochimwa angodetsa mbiri yakeyake.

⁸Usadzudzule wonyoza kuti angakude; dzudzula wanzeru adzakukonda.

⁹Ukachenjeza wanzeru adzakulitsa nzeru yake; ukaphunzitsa wolungama adzaonjezera kuphunzira.

¹⁰Chiyambi cha nzeru ndicho kuopa Yehova; kudziwa Woyerayo ndiko luntha.

¹¹Pakuti mwa ine masiku ako adzachuluka, zaka za moyo wako zidzaonjezedwa.

¹²Ukakhala wanzeru, si yakoyako nzeruyo? Ndipo ukanyoza udzasauka wekha.

¹³Utsiru umalongolola, ngwa chibwana osadziwa kanthu.

¹⁴Ukhala pa khomo la nyumba yake, pampando pa misanje ya m'mudzi,

¹⁵kuti uitane akupita panjira, amene angonkabe m'kuyenda kwao,

¹⁶wachibwana ndani? Apatukire kuno. Ati kwa yense wopanda nzeru,

¹⁷madzi akuba atsekemera, ndi chakudya chobisika chikoma.

¹⁸Ndipo mwamunayo sadziwa kuti akufa ali konko; omwe achezetsa utsiru ali m'manda akuya.