Read Chichewa Buku Lopatulika Bible 2014 MLALIKI 1 Bible Online

MLALIKI 1 - Chichewa Buku Lopatulika Bible 2014 bible

MLALIKI 1

¹Mau a Mlaliki, mwana wa Davide, mfumu ya m'Yerusalemu.

²Zachabechabe, ati Mlaliki; zachabechabe zonse ndi chabe.

³Kodi ntchito zake zonse munthu asauka nazo zimpindulira chiyani?

⁴Mbadwo wina upita, mbadwo wina nufika; koma dziko lingokhalabe masiku onse.

⁵Inde dzuwa lituluka, nililowa, nilifulumira komwe linatulukako.

⁶Kulowa kumwera ndi kuzungulira kumpoto zungulirezungulire imaomba mphepo; ibweranso monga mwa mazunguliridwe ake.

⁷Mitsinje yonse ithira m'nyanja, koma nyanja yosadzala; komwe imukira mitsinjeyo, komweko ibweranso.

⁸Zinthu zonse zilemetsa; munthu sakhoza kuzifotokoza; maso sakhuta m'kuona, ndi makutu sakhuta m'kumva.

⁹Chomwe chinaoneka chidzaonekanso; ndi chomwe chinachitidwa chidzachitidwanso; ndipo palibe kanthu katsopano pansi pano.

¹⁰Kodi pali kanthu unganene kuti, Taona katsopano aka? Kanalipo kale, kale lomwe tisanabadwe ife.

¹¹Zoyamba zija sizikumbukiridwa; ngakhale zomwe zilinkudzazo, omwe adzakhalabe m'tsogolomo, sadzazikumbukirai.

¹²Ine Mlaliki ndinali mfumu ya Israele m'Yerusalemu.

¹³Ndipo ndinapereka mtima kufunafuna ndi nzeru, ndi kulondetsa zonse zimachitidwa pansi pa thambo; ntchito yovuta imeneyi Mulungu apatsa ana a anthu akasauke nayo.

¹⁴Ndaona ntchito zonse zipangidwa kunja kuno; ndipo zonsezo ndi chabe ndi kungosautsa mtima.

¹⁵Chokhotakhota sichingaongokenso; ndipo choperewera sichingawerengedwe.

¹⁶Ndinalankhula ndi mtima wanga, ndi kuti, Taona, ndakuza ndi kudzienjezera nzeru koposa onse anakhala m'Yerusalemu ndisanabadwe ine; inde mtima wanga wapenyera kwambiri nzeru ndi chidziwitso.

¹⁷Ndipo ndinapereka mtima kudziwa nzeru ndi kudziwa misala ndi utsiru; ndinazindikira kuti ichinso chingosautsa mtima.

¹⁸Pakuti m'nzeru yambiri muli chisoni chambiri; ndi yemwe aenjezera chidziwitso aenjezera zowawa.