Read Chichewa Buku Lopatulika Bible 2014 MLALIKI 10 Bible Online

MLALIKI 10 - Chichewa Buku Lopatulika Bible 2014 bible

MLALIKI 10

¹Ntchentche zakufa zinunkhitsa moipa nizioletsa mafuta onunkhira a sing'anga; chomwecho kupusa kwapang'ono kuipitsa iye amene atchuka chifukwa cha nzeru ndi ulemu.

²Wanzeru, mtima wake uli kudzanja lake lamanja; koma chitsiru, mtima wake kulamanzere.

³Inde, poyendanso chitsiru panjira, nzeru yake imthera ndipo angoti kwa onse kuti, Ndine chitsiru.

⁴Ngati mkulu akukwiyira, usasiye malo ako; chifukwa chifatso chipembedza utachimwa kwambiri.

⁵Pali choipa ndachiona pansi pano, ngati kulakwa koyambira ndi mkulu;

⁶utsiru ukhazikika pamwamba penipeni, ndipo olemera angokhala mwamanyazi.

⁷Ndaona akapolo atakwera pa akavalo, ndi mafumu, alikuyenda pansi ngati akopolo.

⁸Wokumba mbuna adzagwamo; ndipo woboola mpanda njoka idzamluma.

⁹Wosendeza miyala adzaphwetekedwa nayo; wowaza nkhuni nadzitema.

¹⁰Chitsulo chikakhala chosathwa, ndipo ukaleka kunola, uzipambana kulimbikira; koma nzeru ipindulira pochenjeza.

¹¹Njoka ikaluma isanalodzedwe, watsenga saona mphotho.

¹²Mau a m'kamwa mwa munthu wanzeru nga chisomo; koma milomo ya chitsiru idzachimeza.

¹³Chiyambi cha mau a m'kamwa mwake ndi utsiru; ndipo chimaliziro cha m'kamwa mwake ndi misala yoipa.

¹⁴Chitsiru chichulukitsanso mau; koma munthu sadziwa chimene chidzaoneka; ndipo ndani angamuuze chomwe chidzakhala m'tsogolo mwake?

¹⁵Ntchito ya zitsiru izitopetsa zonsezo, pakuti sichidziwa kunka kumudzi.

¹⁶Tsoka kwa dzikowe, pamene mfumu yako ndiye mwana, ndipo akalonga ako adyera mamawa!

¹⁷Mwai kwa dzikowe, pamene mfumu yako ndiye mwana wa aufulu, ndipo akalonga ako adya pa nthawi yoyenera akalimbe osati akaledzere ai.

¹⁸Tsindwi litewa ndi mphwai za eni ake; nyumba nidontha ndi ulesi wa manja.

¹⁹Amaphikira zakudya kuti asekere, vinyo nakondweretsa moyo; ndipo ndalama zivomera zonse.

²⁰Usatemberere mfumu ngakhale poganizira; usatemberere wolemera m'chipinda chogona iwemo; pakuti mbalame ya mlengalenga idzanyamula mauwo, ndipo chouluka ndi mapiko chidzamveketsa zonenazo.