Read Chichewa Buku Lopatulika Bible 2014 MLALIKI 7 Bible Online

MLALIKI 7 - Chichewa Buku Lopatulika Bible 2014 bible

MLALIKI 7

¹Mbiri yabwino iposa zonunkhira zabwino; ndi tsiku lakumwalira liposa tsiku lakubadwa.

²Kunka kunyumba ya maliro kupambana kunka kunyumba ya madyerero; pakuti kujako ndi matsiriziro a anthu onse; ndipo omwe ali ndi moyo adzakumbukirapo.

³Chisoni chiposa kuseka; pakuti nkhope yakugwa ikonza mtima.

⁴Mtima wa anzeru uli m'nyumba ya maliro; koma mtima wa zitsiru uli m'nyumba ya kuseka.

⁵Kumva chidzudzulo cha anzeru kupambana kumva nyimbo ya zitsiru.

⁶Pakuti kuseka kwa chitsiru kunga minga ilikuthetheka pansi pa mphika; ichinso ndi chabe.

⁷Indetu nsautso uyalutsa wanzeru; ndi mtulo uipitsa mtima.

⁸Chitsiriziro cha kanthu chiposa chiyambi chake; wofatsa mtima apambana wodzikuza mtima.

⁹Usakangaze mumtima mwako kukwiya; pakuti mkwiyo ugona m'chifuwa cha zitsiru.

¹⁰Usanene, Kodi bwanji masiku akale anapambana ano? Pakuti sulikufunsa mwanzeru pamenepo.

¹¹Nzeru ili yabwino pamodzi ndi cholowa; akuona dzuwa apindula nayo.

¹²Pakuti nzeru itchinjiriza monga ndalama zitchinjiriza; koma kudziwa kupambana, chifukwa nzeru isunga moyo wa eni ake.

¹³Tapenya ntchito ya Mulungu; pakuti ndani akhoza kulungamitsa chomwe iye anachikhotetsa?

¹⁴Tsiku la mwai kondwera, koma tsiku la tsoka lingirira; Mulungu waika ichi pambali pa chinzake, kuti anthu asapeze kanthu ka m'tsogolo mwao.

¹⁵Ndaona zonsezi masiku anga achabe; pali wolungama angofa m'chilungamo chake, ndipo pali woipa angokhalabe ndi moyo m'kuipa kwake.

¹⁶Usapambanitse kukhala wolungama; usakhale wanzeru koposa; bwanji ufuna kudziononga wekha?

¹⁷Usapambanitse kuipa, ngakhale kupusa; uferenji nthawi yako isanafike?

¹⁸Kuli kwabwino kugwira ichi; indetu, usachotsepo dzanja lako pakuti yemwe aopa Mulungu adzatuluka monsemo.

¹⁹Nzeru ilimbitsa wanzeru koposa akulu khumi akulamulira m'mudzi.

²⁰Pakuti kulibe wolungama pansi pano amene achita zabwino osachimwa.

²¹Mau onsetu onenedwa usawalabadire; kuti usamve kapolo wako alikukutemberera;

²²pakuti kawirikawiritu mtima wako udziwa kuti nawenso unatemberera ena.

²³Ndayesa zonsezi ndi nzeru; ndinati, Ndidzakhala wanzeru; koma inanditalikira.

²⁴Chakutali ndi chakuyadi, adzachipeza ndani?

²⁵Ndinapotoka ndi mtima wanga womwe kudziwa ndi kusanthula ndi kufunafuna nzeru ndi malongosoledwe a zinthu, ndi kudziwa kuti udyo ndiwo utsiru, ndi kuti kupusa ndi misala;

²⁶ndipo ndinapeza kanthu kowawa koposa imfa, ndiko mkazi amene ndiye msampha, mtima wake ukunga maukonde, manja ake ndiwo matangadza; yemwe Mulungu amuyesa wabwino adzapulumuka kwa iye; koma wochimwa adzagwidwa naye.

²⁷Taonani, ichi ndachipeza, ati Mlalikiyo, m'kuphatikiza chinthu china ndi chinzake, ndikazindikire malongosoledwe ao;

²⁸chomwe moyo wanga uchifuna chifunire, koma osachipezai ndi ichi, mwamuna mmodzi mwa chikwi ndinampezadi, koma mkazitu mwa onsewo sindinampeza.

²⁹Taonani, ichi chokha ndachipeza kuti Mulungu analenga anthu oongoka mtima; koma iwowo afunafuna malongosoledwe a mitundumitundu.