Read Chichewa Buku Lopatulika Bible 2014 NYIMBO YA SOLOMONI 1 Bible Online

NYIMBO YA SOLOMONI 1 - Chichewa Buku Lopatulika Bible 2014 bible

NYIMBO YA SOLOMONI 1

¹Nyimbo yoposa, ndiyo ya Solomoni.

²Mnyamatayo andipsompsonetse ndi m'kamwa mwake; pakuti chikondi chako chiposa vinyo.

³Mafuta ako anunkhira bwino; dzina lako likunga mafuta onunkhira otsanulidwa; chifukwa chake anamwali akukonda.

⁴Undikoke; tikuthamangire; mfumu yandilowetsa m'zipinda zake: Tidzasangalala ndi kukondwera ndi iwe. Tidzatchula chikondi chako koposa vinyo: Akukonda molungama.

⁵Wakuda ine, koma wokongola, ana akazinu a ku Yerusalemu, ngati mahema a Kedara, ngati nsalu zotchinga za Solomoni.

⁶Musayang'ane pa ine, pakuti ndada, pakuti dzuwa landidetsa. Ana amuna a amai anandikwiyira, anandisungitsa minda yamipesa; koma munda wangawanga wamipesa sindinausunga.

⁷Ndiuze, iwe amene moyo wanga ukukonda, umaweta kuti gulu lako? Umaligonetsa kuti pakati pa usana? Pakuti ndikhalirenji ngati wosochera pambali pa magulu a anzako?

⁸Ngati sudziwa, mkaziwe woposa kukongola, dzituluka kukalondola bande la gululo, nukawete anaambuzi zako pambali pa mahema a abusa.

⁹Ndakulinganiza, wokondedwa wanga mnyamatawe, ngati akavalo a magaleta a Farao.

¹⁰Masaya ako akongola ndi nkhata zatsitsi, ndi khosi lako ndi zinganga za mkanda wonyezimira.

¹¹Tidzakupangira nkhata zagolide ndi njumu zasiliva.

¹²Pokhala mfumu podyera pake, narido wanga ananunkhira.

¹³Wokondedwa wanga mnyamatayo ali kwa ine ngati thumba la mure, logona pakati pa mawere anga.

¹⁴Wokondedwa wanga ali kwa ine ngati chipukutu cha maluwa ofiira m'minda yamipesa ya ku Engedi.

¹⁵Taona, wakongolatu, bwenzi langa; namwaliwe taona, wakongola, maso ako akunga a nkhunda.

¹⁶Taona, wakongolatu, bwenzi langa, mnyamatawe, inde, wakongoletsa; pogona pathu mpa msipu.

¹⁷Mitanda ya nyumba zathu nja mikungudza, ndi mapaso athu nga mlombwa.