Read Chichewa Buku Lopatulika Bible 2014 NYIMBO YA SOLOMONI 4 Bible Online

NYIMBO YA SOLOMONI 4 - Chichewa Buku Lopatulika Bible 2014 bible

NYIMBO YA SOLOMONI 4

¹Taona, wakongola, bwenzi langa, namwaliwe, taona, wakongola; maso ako akunga a nkhunda patseri pa chophimba chako. Tsitsi lako likunga gulu la mbuzi, zooneka pa phiri la Giliyadi.

²Mano ako akunga gulu la nkhosa zosengasenga, zokwera kuchokera kosamba; yonse ili ndi ana awiri, palibe imodzi yopoloza.

³Milomo yako ikunga mbota yofiira, m'kamwa mwako ndi kukoma: Palitsipa pako pakunga phande la khangaza paseli pa chophimba chako.

⁴Khosi lako likunga nsanja ya Davide anaimangira zida, apachikapo zikopa zikwi, ngakhale zikopa zonse za amuna amphamvu.

⁵Mawere ako awiri akunga ana awiri a nswala obadwa limodzi, akudya pakati pa akakombo.

⁶Mpaka dzuwa litapepa, mithunzi ndi kutanimpha, ndikamuka kuphiri la mure, ndi kuchitunda cha lubani.

⁷Wakongola monsemonse, wokondedwa wanga, namwaliwe, mulibe chilema mwa iwe.

⁸Idza nane kuchokera ku Lebanoni, mkwatibwi, kuchokera nane ku Lebanoni: Unguza pamwamba pa Amana, pa nsonga ya Seniri ndi Heremoni, pa ngaka za mikango, pa mapiri a anyalugwe.

⁹Walanda mtima wanga, mlongo wanga, mkwatibwi; walanda mtima wanga ndi diso lako limodzi, ndi chinganga chimodzi cha pakhosi pako.

¹⁰Ha, chikondi chako nchokongola, mlongo wanga, mkwatibwi! Kodi chikondi chako sichiposa vinyo? Kununkhira kwa mphoka yako ndi kuposa zonunkhiritsa za mitundumitundu!

¹¹M'milomo yako, mkwatibwi, mukukha uchi, uchi ndi mkaka zili pansi pa lilime lako; kununkhira kwa zovala zako ndi kunga kununkhira kwa Lebanoni.

¹²Mlongo wanga, mkwatibwi ndiye munda wotsekedwa; ngati kasupe wotsekedwa, ndi chitsime chopikiza.

¹³Mphukira zako ndi munda wamakangaza, ndi zipatso zofunika, bonongwe ndi narido.

¹⁴Narido ndi chikasu, nzimbe ndi sinamoni, ndi mitengo yonse ya lubani; mure ndi khonje, ndi zonunkhiritsa zonse zomveka.

¹⁵Ndiwe kasupe wa m'minda, chitsime cha madzi amoyo, ndi mitsinje yoyenda yochokera ku Lebanoni.

¹⁶Galamuka, mphepo ya kumpoto iwe, nudze, mphepo iwe ya kumwera; nuombe pamunda panga, kuti zonunkhiritsa zake zitulukemo. Bwenzi langa mnyamatayo, alowe m'munda mwake, nadye zipatso zake zofunika.