Read Chichewa Buku Lopatulika Bible 2014 NYIMBO YA SOLOMONI 5 Bible Online

NYIMBO YA SOLOMONI 5 - Chichewa Buku Lopatulika Bible 2014 bible

NYIMBO YA SOLOMONI 5

¹Ndalowa m'munda mwanga, mlongo wanga, mkwatibwi: Ndatchera mure wanga ndi zonunkhiritsa zanga; ndadya uchi wanga ndi chisa chake; ndamwa vinyo wanga ndi mkaka wanga. Idyani, atsamwalinu, imwani, mwetsani chikondi.

²Ndinagona tulo, koma mtima wanga unali maso: Ndi mau a bwenzi langa mnyamatayo agogoda, nati, nditsegulire, mlongo wanga, wokondedwa wanga, nkhunda yanga, wangwiro wanga: Pakuti pamtu panga padzala mame, patsitsi panga pali madontho a usiku.

³Ndinayankha kuti, Ndavula malaya anga, ndiwavalenso bwanji? Ndasuka mapazi anga; ndiwadetserenji?

⁴Bwenzi langa analonga dzanja lake pazenera, mtima wanga ndi kuguguda chifukwa cha iye.

⁵Ndinauka ndikatsegulire bwenzi langa; pamanja panga panakha mure. Ndi pa zala zanga madzi a mure, pa zogwirira za mpikizo.

⁶Ndinamtsegulira bwenzi langalo; koma ndinampeza, bwenzi langa atachoka. Moyo wanga unalefuka polankhula iye: Ndinamfunafuna, osampeza; ndinamuitana, koma sanandivomere.

⁷Alonda akuyenda m'mudzi anandipeza, nandikantha, nanditema; osunga makoma nandichotsera chophimba changa.

⁸Ndikulumbirirani, ana akazi inu a ku Yerusalemu, mukapeza bwenzi langa, mudzamuuza chiyani? Kuti ndadwala ndi chikondi.

⁹Bwenzi lako aposa abwenzi ena bwanji, mkaziwe woposa kukongola? Bwenzi lako aposa abwenzi ena bwanji, kuti utilumbirira motero?

¹⁰Wokondedwa wanga ali woyera ndi wofiira, womveka mwa zikwi khumi.

¹¹Mutu wake ukunga golide, woyengetsa, tsitsi lake lopotana, ndi lakuda ngati khungubwi.

¹²Ana a maso ake akunga nkhunda pambali pa mitsinje ya madzi; otsukidwa ndi mkaka, okhala pa mitsinje yodzala.

¹³Masaya ake akunga chitipula chobzalamo ndiwo, ngati mitumbira yoyangapo masamba onunkhira: Milomo yake ikunga akakombo, pakukhapo madzi a mure.

¹⁴Manja ake akunga zing'anda zagolide zoikamo zonyezimira zoti biriwiri. Thupi lake likunga chopanga cha minyanga cholemberapo masafiro.

¹⁵Miyendo yake ikunga zoimiritsa za mwala wonyezimira, zogwirika m'kamwa mwa golide: Maonekedwe ake akunga Lebanoni, okometsetsa ngati mikungudza.

¹⁶M'kamwa mwake muli mokoma; inde, ndiye wokondweretsa ndithu. Ameneyu ndi wokondedwa wanga, ameneyu ndi bwenzi langa, ana akazi inu a ku Yerusalemu.