Read Chichewa Buku Lopatulika Bible 2014 NYIMBO YA SOLOMONI 7 Bible Online

NYIMBO YA SOLOMONI 7 - Chichewa Buku Lopatulika Bible 2014 bible

NYIMBO YA SOLOMONI 7

¹Ha, mapazi ako akongola m'zikwakwata, mwana wamkaziwe wa mfumu! Pozinga m'chuuno mwako pakunga zonyezimira, ntchito ya manja a mmisiri waluso.

²Pamchombo pako pakunga chikho choulungika, chosasowamo vinyo wosanganika: Pamimba pako pakunga mulu wa tirigu wozingidwa ndi akakombo.

³Mawere ako akunga ana awiri a nswala anabadwa limodzi.

⁴Khosi lako likunga nsanja yaminyanga; maso ako akunga matawale a ku Hesiboni, a pa chipata cha Batirabimu; mphuno yako ikunga nsanja ya ku Lebanoni imene iloza ku Damasiko.

⁵Mutu wako ukunga Karimele, ndi tsitsi la pamtu pako likunga nsalu yofiirira; mfumu yamangidwa ndi nkhata zake ngati wam'nsinga.

⁶Ha, ndiwe wokongola ndi wofunika, bwenziwe, m'zokondweretsa!

⁷Msinkhu wakowu ukunga mgwalangwa, mawere ako akunga matsango amphesa.

⁸Ndinati, Ndikakwera pa mgwalangwapo, ndikagwira nthambi zake: Mawere ako ange ngati matsango amphesa, ndi kununkhira kwa mpweya wako ngati maula.

⁹M'kamwa mwako munge ngati vinyo woposa, womeza tseketseke bwenzi langa, wolankhulitsa milomo ya ogona tulo.

¹⁰Ndine wa wokondedwa wanga mnyamatayo, ndine amene andifunayo.

¹¹Tiye, bwenzi langa, tinke kuminda; titsotse m'milaga.

¹²Tilawire kunka kuminda yamipesa; tiyang'ane ngati mpesa waphuka, kunje ndi kuonetsa zipatso, makangaza ndi kutuwa maluwa ake; pompo ndidzakupatsa chikondi changa.

¹³Mankhwala a chikondi anunkhira, ndi pamakomo pathu zipatso zabwino, za mitundumitundu, zakale ndi zatsopano, zimene ndakukundikira iwe, wokondedwa wanga.