Read Chichewa Buku Lopatulika Bible 2014 NYIMBO YA SOLOMONI 8 Bible Online

NYIMBO YA SOLOMONI 8 - Chichewa Buku Lopatulika Bible 2014 bible

NYIMBO YA SOLOMONI 8

¹Mwenzi utakhala ngati mlongo wanga, woyamwa pa bere la amai! Ndikadakupeza panja, ndikadakupsompsona; osandinyoza munthu.

²Ndikadakutsogolera, kukulowetsa m'nyumba ya amai, kuti andilange mwambo; ndikadakumwetsa vinyo wokoleretsa, ndi madzi a makangaza anga.

³Dzanja lamanzere lake akadanditsamiritsa kumutu, lamanja lake ndi kundifungatira.

⁴Ndikulumbirirani, ana akazi inu a ku Yerusalemu, muutsiranji, mugalamutsiranji chikondi, chisanafune mwini.

⁵Ndaniyu achokera kuchipululu, alikutsamira bwenzi lake? Pa tsinde la muula ndinakugalamutsa mnyamatawe: Pomwepo amai ako anali mkusauka nawe, pomwepo wakukubala anali m'pakati pa iwe.

⁶Undilembe pamtima pako, mokhoma chizindikiro, nundikhomenso chizindikiro pamkono pako; pakuti chikondi chilimba ngati imfa; njiru imangouma ngati manda: Kung'anima kwake ndi kung'anima kwa moto, ngati mphezi ya Yehova.

⁷Madzi ambiri sangazimitse chikondi, ngakhale mitsinje yodzala kuchikokolola: Mwamuna akapereka katundu yense wa m'nyumba yake ngati sintho la chikondi, akanyozedwa ndithu.

⁸Tili ndi mlongwathu wamng'ono, alibe mawere; timchitirenji mlongo wathu tsiku lokhoma unkhoswe wake?

⁹Ngati ndiye khoma, tidzamanga pa iye nsanja yasiliva: Ngati ndiye chitseko tidzamtsekereza ndi matabwa amikungudza.

¹⁰Ndine khoma, mawere anga akunga nsanja zake: Pamaso pa mnyamatayo ndinafanana ngati wopeza mtendere.

¹¹Solomoni anali ndi munda wamipesa ku Baala-Hamoni; nabwereka alimi mundawo; yense ambwezere ndalama chikwi chifukwa cha zipatso zake.

¹²Koma munda wanga wamipesa, uli pamaso panga ndiwo wangatu; nacho chikwicho, Solomoni iwe, koma olima zipatso zake azilandira mazana awiri.

¹³Namwaliwe wokhala m'minda, anzako amvera mau ako: Nanenanso undimvetse.

¹⁴Dzifulumira, mnyamatawe wokondedwa wanga, dzifanane ngati mphoyo pena mwana wa mbawala pa mapiri a mphoka.