Read Chichewa Buku Lopatulika Bible 2014 YESAYA 19 Bible Online

YESAYA 19 - Chichewa Buku Lopatulika Bible 2014 bible

YESAYA 19

¹Katundu wa Ejipito. Taonani, Yehova wakwera pamwamba pa mtambo wothamanga, nadza ku Ejipito; ndi mafano a Ejipito adzagwedezeka pakufika kwake, ndi mtima wa Ejipito udzasungunuka pakati pake.

²Ndipo ndidzapikisanitsa Aejipito; ndipo adzamenyana wina ndi mbale wake, ndi wina ndi mnansi wake; mudzi kumenyana ndi mudzi, ndi ufumu kumenyana ndi ufumu.

³Ndipo mzimu wa Ejipito adzakhala wachabe pakati pake; ndipo Ine ndidzaononga uphungu wake; ndimo iwo adzafunafuna mafano ndi anyanga, ndi alauli, ndi obwebweta.

⁴Ndipo ndidzapereka Ejipito m'manja mwa mbuye wankharwe; ndi mfumu yaukali idzawalamulira, ati Ambuye, Yehova wa makamu.

⁵Ndipo madzi adzaphwa m'nyanja yaikulu, ndipo nyanja yoyendamo madzi idzaphwa, niuma.

⁶Ndipo nyanja zidzanunkha; mitsinje ya Ejipito idzachepa, nuima; bango ndi mlulu zidzafota.

⁷Madambo oyandikana ndi Nailo, pafupi ndi gombe la Nailo, ndi zonse zobzala pa Nailo zidzauma, nizichotsedwa, zosakhalanso konse.

⁸Asodzinso adzalira, ndi onse oponya mbedza m'Nailo adzaliralira, ndi onse oponya makoka m'madzi, adzalefuka.

⁹Komanso iwo amene agwira ntchito yakupala thonje, ndi iwo amene aomba nsalu yoyera, adzakhala ndi manyazi.

¹⁰Ndipo maziko ake adzasweka, onse amene agwira ntchito yolipidwa adzavutidwa mtima.

¹¹Akalonga a Zowani apusa ndithu; uphungu wa aphungu anzeru a Farao wasanduka wopulukira; bwanji iwe unena kwa Farao, Ine ndine mwana wa anzeru, mwana wa mafumu akale?

¹²Nanga tsopano anzeru ali kuti? Akuuze iwe tsopano; adziwe chimene Yehova wa makamu watsimikiza mtima kuchitira Ejipito.

¹³Akalonga a Zowani apusa, akalonga a Nofi anyengedwa; iwo asocheretsa Ejipito, amene ali mwala wa pangodya wa mafuko ake.

¹⁴Yehova wasanganiza mzimu wa kusaweruzika pakati pake; ndipo iwo asocheretsa Ejipito m'ntchito zake zonse, monga mwamuna woledzera ayenda punzipunzi posanza pake.

¹⁵Ejipito sadzakhala ndi ntchito, imene mutu pena mchira, pena nthambi ya kanjedza, pena mlulu zidzaigwira.

¹⁶Tsiku limenelo Ejipito adzanga akazi; ndipo adzanthunthumira ndi kuopa, chifukwa cha kugwedeza kwa dzanja la Yehova wa makamu, limene Iye agwedeza pamwamba pake.

¹⁷Ndipo dziko la Yuda lidzaopsa Ejipito, yense wakulitchula adzamtembenukira mwamantha, chifukwa cha uphungu wa Yehova wa makamu, aupanga pa dzikolo.

¹⁸Tsiku limenelo padzakhala midzi isanu m'dziko la Ejipito yolankhula chinenero cha Kanani, ndi yolumbira, Pali Yehova wa makamu; wina udzatchedwa, Mudzi wa chionongeko.

¹⁹Tsiku limenelo padzakhala guwa la nsembe la Yehova pakati pa dziko la Ejipito, ndi choimiritsa cha Yehova m'malire ake.

²⁰Ndipo chidzakhala chizindikiro ndi mboni ya Yehova wa makamu m'dziko la Ejipito; pakuti iwo adzalirira kwa Yehova, chifukwa cha osautsa, ndipo Iye adzawatumizira mpulumutsi, ndi wamphamvu, nadzawapulumutsa.

²¹Ndipo Yehova adzadziwika kwa Ejipito, ndipo Aejipito adzadziwa Yehova tsiku limenelo; inde iwo adzapembedzera ndi nsembe ndi zopereka, nadzawindira Yehova ndi kuchitadi.

²²Ndipo Yehova adzakantha Ejipito kukantha ndi kuchiritsa; ndipo iwo adzabwerera kwa Yehova, ndipo Iye adzapembedzedwa ndi iwo, nadzawachiritsa.

²³Tsiku limenelo padzakhala khwalala lochokera m'Ejipito kunka ku Asiriya, ndipo Mwasuri adzafika ku Ejipito, ndi Mwejipito adzafika ku Asiriya, ndipo Aejipito adzapembedzera pamodzi ndi Aasiriya.

²⁴Tsiku limenelo Israele ndi Ejipito ndi Asiriya atatuwa, adzakhala mdalitso pakati pa dziko lapansi;

²⁵pakuti Yehova wa makamu wadalitsa iwo, ndi kuti, Odalitsika Ejipito anthu anga, ndi Asiriya ntchito ya manja anga, ndi Israele cholowa changa.