Read Chichewa Buku Lopatulika Bible 2014 LEVITIKO 18 Bible Online

LEVITIKO 18 - Chichewa Buku Lopatulika Bible 2014 bible

LEVITIKO 18

¹Ndipo Yehova ananena ndi Mose, nati,

²Nena ndi ana a Israele, nuti nao, Ine ndine Yehova Mulungu wanu.

³Musamachita monga mwa machitidwe a dziko la Ejipito, muja munakhalamo; musamachita monga mwa machitidwe a dziko la Kanani kumene ndipita nanuko, nimusamayenda m'malemba ao.

⁴Muzichita maweruzo anga, ndi kusunga malemba anga, kumayenda m'mwemo; Ine ndine Yehova Mulungu wanu.

⁵Inde, muzisunga malemba anga, ndi maweruzo anga; amenewo munthu akawachita, adzakhala nao ndi moyo; Ine ndine Yehova.

⁶Asasendere mmodzi wa inu kwa mbale wake kumvula; Ine ndine Yehova.

⁷Usamavula atate wako, ndi mai wako; ndiye mai wako, usamamvula.

⁸Usamavula mkazi wa atate wako; ndiye thupi la atate wako.

⁹Usamavula mlongo wako, mwana wamkazi wa atate wako, kapena mwana wamkazi wa mai wako, wobadwa kwanu, kapena wobadwa kwina.

¹⁰Usamavula mwana wamkazi wa mwana wamwamuna wako, kapena mwana wamkazi wa mwana wamkazi wako; pakuti thupi lao ndi lako.

¹¹Usamavula mwana wamkazi wa mkazi wa atate wako, amene anambala atate wako, ndiye mlongo wako.

¹²Usamavula mlongo wa atate wako; ndiye wa chibale cha atate wako.

¹³Usamavula mbale wa mai wako; popeza ndiye mbale wa mai wako.

¹⁴Usamavula mbale wa atate wako; usamasendera kwa mkazi wake; ndiye mai wako.

¹⁵Usamavula mpongozi wako; ndiye mkazi wa mwana wamwamuna wako; usamamvula.

¹⁶Usamavula mkazi wa mbale wako; ndiye thupi la mbale wako.

¹⁷Usamavula mkazi ndi mwana wamkazi wake; usamatenga mwana wamkazi wa mwana wamwamuna wake, kapena mwana wamkazi wa mwana wamkazi wake kumvula; ndiwo abale; chochititsa manyazi ichi.

¹⁸Usamtenga mkazi kumuonjezera kwa mbale wake, kumvuta, kumvula pamodzi ndi mnzake, akali ndi moyo mnzakeyo.

¹⁹Usamasendera kwa mkazi kumvula pokhala ali padera chifukwa cha kudetsedwa kwake.

²⁰Usagona naye mkazi wa mnansi wako, kudetsedwa naye limodzi.

²¹Ndipo usamapereka a mbumba yako kuwapitiriza kumoto chifukwa cha Moleki; usamaipsa dzina la Mulungu wako; Ine ndine Yehova.

²²Usamagonana ndi mwamuna, monga amagonana ndi mkazi; chonyansa ichi.

²³Ndipo usamagonana ndi nyama iliyonse, kudetsedwa nayo; kapena mkazi asamaima panyama, kugonana nayo; chisokonezo choopsa ichi.

²⁴Musamadzidetsa nacho chimodzi cha izi; pakuti amitundu amene ndiwapirikitsa pamaso panu amadetsedwa nazo zonsezi;

²⁵dziko lomwe lidetsedwa; chifukwa chake ndililanga, ndi dzikoli lisanza okhala m'mwemo.

²⁶Koma inu, muzisunga malemba anga ndi maweruzo anga, osachita chimodzi chonse cha zonyansa izi; ngakhale wa m'dziko ngakhale mlendo wakugonera pakati pa inu.

²⁷(Pakuti eni dziko okhalako, musanafike inu, anazichita zonyansa izi zonse, ndi dziko linadetsedwa)

²⁸lingakusanzeni inunso dzikoli, polidetsa inu, monga linasanza mtundu wa anthu wokhalako musanafike inu.

²⁹Pakuti aliyense akachita chilichonse cha zonyansa izi, inde amene azichita adzasadzidwa pakati pa anthu a mtundu wao.

³⁰Potero muzisunga chilangizo changa, ndi kusachita zilizonse za miyambo yonyansayi anaichita musanafike inu, ndi kusadzidetsa nayo: Ine ndine Yehova Mulungu wako.