Read Chichewa Buku Lopatulika Bible 2014 MALIRO 3 Bible Online

MALIRO 3 - Chichewa Buku Lopatulika Bible 2014 bible

MALIRO 3

¹Ine ndine munthuyu wakuona msauko ndi ndodo ya ukali wake.

²Wanditsogolera, nandiyendetsa mumdima, si m'kuunika ai.

³Zoonadi amandibwezerabwezera dzanja lake monditsutsa tsiku lonse.

⁴Wagugitsa thupi langa ndi khungu langa, nathyola mafupa anga.

⁵Wandimangira zithando za nkhondo, wandizinga ndi ulembe ndi mavuto.

⁶Wandikhalitsa mumdima ngati akufa kale.

⁷Wanditsekereza ndi guta, sindingatuluke; walemeretsa unyolo wanga.

⁸Inde, pofuula ine ndi kuitana andithandize amakaniza pemphero langa.

⁹Watsekereza njira zanga ndi miyala yosema, nakhotetsa mayendedwe anga.

¹⁰Andikhalira chilombo cholalira kapena mkango mobisalira.

¹¹Wapambutsa njira zanga, nanding'amba; nandipululutsa.

¹²Wathifula uta wake, nandiyesa polozetsa muvi.

¹³Walasa impso zanga ndi mivi ya m'phodo mwake.

¹⁴Ndasanduka wondiseka mtundu wanga wonse, ndi nyimbo yao tsiku lonse.

¹⁵Wandidzaza ndi zowawa, wandikhutitsa chivumulo.

¹⁶Wathyolanso mano anga ndi tinsangalabwi, wandikuta ndi phulusa.

¹⁷Watalikitsanso moyo wanga ndi mtendere; ndinaiwala zabwino.

¹⁸Ndipo ndinati, Mphamvu yanga yatha, osayembekezanso kanthu kwa Yehova.

¹⁹Kumbukirani msauko wanga ndi kusochera kwanga, ndizo chivumulo ndi ndulu.

²⁰Moyo wanga uzikumbukirabe nuwerama mwa ine.

²¹Ndili nacho chiyembekezo popeza ndilingalira ichi ndiyembekeza kanthu.

²²Chifukwa chakusathedwa ife ndicho chifundo cha Yehova, pakuti chisoni chake sichileka,

²³chioneka chatsopano m'mawa ndi m'mawa; mukhulupirika ndithu.

²⁴Moyo wanga uti, Gawo langa ndiye Yehova; chifukwa chake ndidzakhulupirira.

²⁵Yehova akhalira wabwino omlindirira, ndi moyo womfunafuna.

²⁶Nkokoma kuti munthu ayembekeze ndi kulindirira modekha chipulumutso cha Yehova.

²⁷Nkokoma kuti munthu asenze goli ali wamng'ono.

²⁸Akhale pa yekha, natonthole, pakuti Mulungu wamsenzetsa ilo.

²⁹Aike kamwa lake m'fumbi; kapena chilipo chiyembekezo.

³⁰Atembenuzire wompanda tsaya lake, adzazidwe ndi chitonzo.

³¹Pakuti Yehova sadzataya kufikira nthawi zonse.

³²Angakhale aliritsa, koma adzachitira chisoni monga mwa kuchuluka kwa zifundo zake.

³³Pakuti samasautsa dala, ngakhale kumvetsa ana a anthu chisoni.

³⁴Kupondereza andende onse a m'dziko,

³⁵kupambutsa chiweruzo cha munthu pamaso pa Wam'mwambamwamba;

³⁶kukhotetsa mlandu wa munthu, zonsezi Ambuye sazikonda.

³⁷Ndani anganene, chonena chake ndi kuchitikadi, ngati Ambuye salamulira?

³⁸Kodi m'kamwa mwa Wam'mwambamwamba simutuluka zovuta ndi zabwino?

³⁹Kodi munthu wamoyo adandauliranji pokhala m'zochimwa zake?

⁴⁰Tisanthule ntiyese njira zathu ntibwerenso kwa Yehova.

⁴¹Titukulire mitima yathu ndi manja athu omwe kwa Mulungu ali kumwamba.

⁴²Ife tilakwa ndi kupikisana nanu, ndipo Inu simunatikhululukira.

⁴³Mwadzikuta ndi mkwiyo ndi kutilondola, mwatipha osachitira chisoni.

⁴⁴Mwadzikuta ndi mtambo kuti pemphero lathu lisapyolemo.

⁴⁵Mwatiika pakati pa amitundu ngati zinyalala ndi za kudzala.

⁴⁶Adani athu onse anatiyasamira.

⁴⁷Mantha ndi dzenje zitifikira, ndi phokoso ndi chionongeko.

⁴⁸M'diso mwanga mutsika mitsinje ya madzi chifukwa cha mwana wamkazi wa anthu a mtundu wanga woonongedwa.

⁴⁹Diso langa lingotsanulira osaleka, osapumula,

⁵⁰kufikira Yehova adzazolika kumwamba ndi kuona.

⁵¹Diso langa limvetsa moyo wanga zowawa chifukwa cha ana akazi onse a m'mudzi mwanga.

⁵²Ondida opanda chifukwa anandiinga ngati mbalame;

⁵³anaononga moyo wanga m'dzenje, naponya mwala pamwamba pa ine;

⁵⁴madzi anayenda pamwamba pa mutu panga, ndinati, Ndalikhidwa.

⁵⁵Ndinaitana dzina lanu, Yehova, ndili m'dzenje lapansi;

⁵⁶munamva mau anga; musabise khutu lanu popuma ndi pofuula ine.

⁵⁷Munayandikira tsiku la kukuitanani ine; munati, Usaope.

⁵⁸Ambuye munanenera moyo wanga milandu yake; munaombola moyo wanga.

⁵⁹Yehova, mwaona choipa anandichitiracho, mundiweruzire.

⁶⁰Mwaona kubwezera kwao konse ndi zopangira zao zonse za pa ine.

⁶¹Mwamva chitonzo chao, Yehova, ndi zopangira zao zonse za pa ine,

⁶²milomo ya akutsutsana nane ndi zolingalira zao za pa ine tsiku lonse.

⁶³Taonani kukhala ndi kunyamuka kwao; ndine nyimbo yao.

⁶⁴Mudzawabwezera chilango, Yehova, monga mwa machitidwe a manja ao.

⁶⁵Muphimbe mtima wao ndi kuwatemberera;

⁶⁶mudzawalondola mokwiya ndi kuwaononga pansi pa thambo la Yehova.