Read Chichewa Buku Lopatulika Bible 2014 MALIRO 5 Bible Online

MALIRO 5 - Chichewa Buku Lopatulika Bible 2014 bible

MALIRO 5

¹Yehova, kumbukirani chotigwerachi, penyani nimuone chitonzo chathu.

²Cholowa chathu chasanduka cha alendo, ndi nyumba zathu za achilendo.

³Ndife amasiye opanda atate, amai athu akunga akazi amasiye.

⁴Tinamwa madzi athu ndi ndalama, tiona nkhuni zathu pozigula.

⁵Otilondola atigwira pakhosi pathu, tatopa osaona popumira.

⁶Tinagwira mwendo Ejipito ndi Asiriya kuti tikhute zakudya.

⁷Atate athu anachimwa, kulibe iwo; ndipo tanyamula mphulupulu zao.

⁸Akapolo atilamulira; palibe wotipulumutsa m'dzanja lao.

⁹Timalowa m'zoopsa potenga zakudya zathu, chifukwa cha lupanga la m'chipululu.

¹⁰Khungu lathu lapserera ngati pamoto chifukwa cha kuwawa kwa njala.

¹¹Anaipitsa akazi m'Ziyoni, ndi anamwali m'midzi ya Yuda.

¹²Anawapachika akalonga manja ao; sanalemekeze nkhope za akulu.

¹³Anyamata ananyamula mphero, ana nakhumudwa posenza nkhuni.

¹⁴Akulu adatha kuzipata, anyamata naleka nyimbo zao.

¹⁵Chimwemwe cha mtima wathu chalekeka, masewera athu asanduka maliro.

¹⁶Korona wagwa pamutu pathu; kalanga ife! Pakuti tinachimwa.

¹⁷Chifukwa cha ichi mtima wathu ufooka, chifukwa cha izi maso athu achita chimbuuzi;

¹⁸pa phiri la Ziyoni lopasukalo ankhandwe ayendapo.

¹⁹Inu, Yehova, mukhala chikhalire, ndi mpando wanu wachifumu ku mibadwomibadwo.

²⁰Bwanji mutiiwala chiiwalire, ndi kutisiya masiku ambirimbiri.

²¹Mutitembenuzire kwa Inu, Yehova, ndipo tidzatembenuzidwadi, mukonzenso masiku athu ngati kale lija.

²²Koma mwatikaniza konse, mwatikwiyira kopambana.