Read Chichewa Buku Lopatulika Bible 2014 EZEKIELE 41 Bible Online

EZEKIELE 41 - Chichewa Buku Lopatulika Bible 2014 bible

EZEKIELE 41

¹Ndipo anadza nane ku Kachisi, nayesa nsanamira zake, kupingasa kwake mikono isanu ndi umodzi chakuno, ndi mikono isanu ndi umodzi chauko, ndiko kupingasa kwa chihema chija.

²Ndi kupingasa kwa khomo mikono khumi; ndi mbali za khomo mikono isanu chakuno, ndi mikono isanu chauko; nayesa malo opatulika, m'litali mwake mikono makumi anai, ndi kupingasa kwake mikono makumi awiri.

³Nalowa m'katimo, nayesa mphuthu za pakhomo mikono iwiri, ndi msinkhu wa khomo mikono isanu ndi umodzi, ndi kupingasa kwa khomo mikono isanu ndi iwiri.

⁴Anayesanso m'kati mwa Kachisi m'tsogolomo, m'litali mwake mikono makumi awiri, ndi kupingasa kwake mikono makumi awiri; ndipo anati kwa ine, Umo m'mopatulika kwambiri.

⁵Pamenepo anayesa khoma la nyumba, kuchindikira kwake mikono isanu ndi umodzi, ndi kupingasa kwake kwa zipinda za m'mphepete mikono inai, pozungulira pake ponse pa Kachisi.

⁶Ndipo zipinda za m'mphepete zinasanjikizana china pa chinzake; zinatero makumi atatu mizere yonse itatu, nizinalowa kukhoma lochirikiza zipinda za m'mphepete pozungulirapo, zisanjikike pamenepo; pakuti sizinagwiridwa ndi khoma la nyumba.

⁷Ndipo zipinda za m'mphepete zinakula m'kupingasa kwao, pozinga nyumba m'kukwera kwao; pakuti nyumba inazingika mokwerakwera pozungulira pake pa nyumba; motero kupingasa kwake kwa nyumba kunakula kumwamba kwake, momwemonso anakwera kuyambira chipinda chakunsi, kupita chapakati, kufikira cham'mwamba.

⁸Ndinaonanso kuti kunyumba kunali chiunda pozungulira pake; maziko a zipinda za m'mphepete anafikira muyeso wa bango la mikono isanu ndi umodzi yaikulu.

⁹Kuchindikira kwa khoma la kuzipinda za m'mphepete kunja kwake kunali mikono isanu; ndipo mpata wake unali malo olowera m'zipinda za m'mphepete za Kachisi.

¹⁰Ndi pakati pa zipinda panali kupingasa kwa mikono makumi awiri, pozungulira pake ponse pa nyumba.

¹¹Ndi makomo a zipinda za m'mphepete analoza kumpatawo, khomo lina kumpoto, ndi lina kumwera; ndi malo a pa mpatawo anayesa mikono isanu kupingasa kwake pozungulira pake.

¹²Ndipo nyumba inali kutsogolo kwa mpata wa mbali ya kumadzulo inali ya mikono makumi asanu ndi awiri kupingasa kwake; ndi khoma la nyumbayo pozungulira pake linali la mikono isanu kuchindikira kwake; ndi m'litali mwake mikono makumi asanu ndi anai.

¹³Momwemo anayesa Kachisi m'litali mwake mikono zana limodzi; ndi mpatawo, ndi nyumbayo, ndi makoma ake, mikono zana limodzi;

¹⁴kupingasa kwake komwe kwa kukhomo kwa nyumba, ndi kumpatawo kum'mawa, mikono zana limodzi.

¹⁵Momwemo anayesa m'litali mwake nyumbayo inali kutsogolo kwake kwa mpata wokhala chakuno chake, ndi makonde ake am'mwamba, chakuno ndi chauko, mikono zana limodzi, ndi Kachisi wa m'katimo, ndi makonde a kubwalo;

¹⁶ziundo, ndi mazenera amkati okhazikika, ndi makonde am'mwamba akuzinga zipinda zosanjikizana zao zitatu, pandunji pa chiundo, otchinga ndi matabwa pozungulira pake, kuyambira pansi kufikira kumazenera; koma mazenera anaphimbika;

¹⁷kufikira kumwamba pa khomo, mpaka nyumba ya m'katimo, ndi kunja kwake, ndi khoma lonse kwete m'kati ndi kunja, monga mwa miyeso.

¹⁸Ndipo panalembedwapo ndi akerubi ndi akanjedza, kanjedza pakati pa akerubi; ndi kerubi aliyense anali ndi nkhope zake ziwiri;

¹⁹nkhope ya munthu kuloza kukanjedza chakuno, ndi nkhope ya mwanawamkango kuloza kukanjedza chauko, momwemo m'nyumba monse pozungulira pake.

²⁰Kuyambira pansi kufikira pamwamba pa khomo panalembedwa akerubi ndi akanjedza; linatero khoma la Kachisi.

²¹Mphuthu za Kachisi zinali zaphwamphwa, ndi maonekedwe a pakhomo pa malo opatulika ananga maonekedwe a Kachisi.

²²Guwa la nsembe linali lamtengo, msinkhu wake mikono itatu, ndi m'litali mwake mikono iwiri, ndi ngodya zake, ndi tsinde lake, ndi thupi, nza mtengo; ndipo ananena ndi ine, Ili ndiko gome lili pamaso pa Yehova.

²³Ndipo Kachisi ndi malo opatulika kwambiri anali nazo zitseko ziwiri.

²⁴Ndipo pamakomopo panali zitseko zopatukana zotembenuzika, china chopatukana pa khomo lina china pa linzake.

²⁵Ndipo panalembedwa pamenepo pa zitseko za Kachisi akerubi ndi akanjedza, akunga aja adalembedwa pamakoma; ndipo panali matabwa ochindikira pakhomo pakhonde panja.

²⁶Ndipo panali mazenera amkati okhazikika, ndi akanjedza chakuno ndi chauko, kumbali zake za khonde; momwemonso pa zipinda za m'mphepete mwa nyumba, ndi pa matabwa ochindikira.