Read Chichewa Buku Lopatulika Bible 2014 EZEKIELE 42 Bible Online

EZEKIELE 42 - Chichewa Buku Lopatulika Bible 2014 bible

EZEKIELE 42

¹Pamenepo anatuluka nane kunka kubwalo la kunja, njira ya kumpoto; nalowa nane kunyumba yazipinda idali pandunji pa mpatawo, ndi pandunji pa nyumbayo inaloza kumpoto.

²Chakuno cha m'litali mwake mwa mikono zana limodzi kunali khomo la kumpoto, ndi kupingasa kwake mikono makumi asanu.

³Pandunji pa mikono makumi awiri a bwalo lam'kati, ndi pandunji pa moyalamo mwa miyala, mwa bwalo lakunja, panali khonde lam'mwamba, lokomana ndi khonde linzake losanjikika pachiwiri.

⁴Ndi kukhomo kwa zipinda anakonza poyendapo, kupingasa kwake mikono khumi m'kati mwake, njira ya mikono zana limodzi, ndi makomo ao analoza kumpoto.

⁵Ndipo zipinda zapamwamba zinachepa, pakuti makonde am'mwamba analanda pamenepo, chifukwa chake zinachepa koposa zapansi ndi zapakati m'nyumba yazipinda.

⁶Pakuti zinasanjikizana pawiri, ndipo zinalibe nsanamira ngati nsanamira za kumabwalo; chifukwa chake zam'mwambazo zinachepa koposa zakunsi ndi pakati kuyambira pansi.

⁷Ndipo linga linali kunjalo, lolingana ndi nyumba yazipinda, kuloza kubwalo lakunja, popenyana ndi nyumba yazipinda, m'litali mwake munali mikono makumi asanu.

⁸Pakuti kupingasa kwake kwa nyumba yazipinda inali m'bwalo lakunja, kunali mikono makumi asanu; ndipo taonani, kuloza kukhomo la Kachisi inali mikono zana limodzi.

⁹Ndipo pansi pa zipinda izi panali polowera mbali ya kum'mawa, poloweramo kuchoka kubwalo lakunja.

¹⁰M'kuchindikira kwa linga la bwalo, kuloza kumwera, chakuno cha mpatawo, chakuno cha nyumba, panali nyumba yazipinda.

¹¹Ndipo njira ya pakhomo pao inanga maonekedwe njira ya kunyumba yazipinda yoloza kumpoto, inalingana nayo m'litali mwake, momwemonso kupingasa kwake; ndi m'matulukiro mwake monse munali monga mwa machitidwe a inzake, ndi monga mwa makomo a inzake.

¹²Ndi monga mwa makomo a zipinda za kumwera panali khomo polekeza njira, ndiyo njira yokhudzana ndi linga la kum'mawa polowamo.

¹³Pamenepo anati kwa ine, Zipinda za kumpoto, ndi zipinda za kumwera, zili chakuno cha mpatawo, ndizo zipinda zopatulika, kumene ansembe okhala pafupi pa Yehova azidyera zinthu zopatulika kwambiri; kumeneko aziika zopatulika kwambiri, ndi nsembe yaufa, ndi nsembe yauchimo, ndi nsembe yopalamula; pakuti malowo ndi opatulika.

¹⁴Atalowa ansembe asatulukenso m'malo opatulika kunka kubwalo lakunja, koma komweko aziika zovala zao zimene atumikira nazo; pakuti zili zopatulika; ndipo avale zovala zina, nayandikire zinthu wamba za anthu.

¹⁵Atatha tsono kuyesa nyumba ya m'katimo, anatuluka nane njira ya chipata choloza kum'mawa nayesa bwalo pozungulira pake.

¹⁶Anayesa mbali ya kum'mawa, ndi bango loyesera, mikono mazana asanu, kuyesa ndi bango loyesera.

¹⁷Anayesa mbali ya kumpoto mikono mazana asanu, kuyesa ndi bango loyesera.

¹⁸Anayesa mbali ya kumwera mikono mazana asanu, kuyesa ndi bango loyesera.

¹⁹Anatembenukira kumbali ya kumadzulo, nayesa mikono mazana asanu ndi bango loyesera.

²⁰Analiyesa mbali zake zinai, linali nalo linga pozungulira pake, utali wake mikono mazana asanu, chitando chake mikono mazana asanu, kusiyanitsa pakati pa zopatulika ndi zinthu wamba.