Read Chichewa Buku Lopatulika Bible 2014 NUMERI 34 Bible Online

NUMERI 34 - Chichewa Buku Lopatulika Bible 2014 bible

NUMERI 34

¹Ndipo Yehova ananena ndi Mose, nati,

²Uza ana a Israele, nunene nao, Mutalowa m'dziko la Kanani, ndilo dziko logwera inu, likhale cholowa chanu, dziko la Kanani monga mwa malire ake,

³dera lanu la kumwera lidzakhala lochokera ku chipululu cha Zini, kutsata m'mphepete mwa Edomu, ndi malire anu a kumwera adzakhala ochokera ku malekezero a Nyanja ya Mchere kum'mawa;

⁴ndi malire anu adzapinda kuchokera kumwera kunka pokwera Akarabimu, ndi kupitirira ku Zini; ndi kutuluka kwake adzachokera kumwera ku Kadesi-Baranea, nadzatuluka kunka ku Hazara-Adara, ndi kupita kunka ku Azimoni;

⁵ndipo malirewo adzapinda ku Azimoni kunka ku mtsinje wa Ejipito, ndi kutuluka kwao adzatuluka kunyanja.

⁶Kunena za malire a kumadzulo Nyanja Yaikulu ndiyo malire anu; ndiyo malire anu a kumadzulo.

⁷Malire anu a kumpoto ndiwo: kuyambira ku Nyanja Yaikulu mulinge kuphiri la Hori:

⁸kuchokera kuphiri la Hori mulinge polowera Hamati; ndipo kutuluka kwake kwa malire kudzakhala ku Zedadi.

⁹Ndipo malirewo adzatuluka kunka ku Zifuroni, ndi kutuluka kwake kudzakhala ku Hazara-Enani; ndiwo malire anu a kumpoto.

¹⁰Ndipo mudzilembere malire a kum'mawa ochokera ku Hazara-Enani kunka ku Sefamu;

¹¹ndi malire adzatsika ku Sefamu kunka ku Ribula, kum'mawa kwa Aini; ndipo malire adzatsika, nadzafikira mbali ya nyanja ya Kinereti kum'mawa,

¹²ndi malire adzatsika ku Yordani, ndi kutuluka kwake kudzakhala ku Nyanja ya Mchere; ili ndili dziko lanu monga mwa malire ake polizinga.

¹³Ndipo Mose anauza ana a Israele, nati, Ili ndi dzikoli mudzalandira ndi kuchita maere, limene Yehova analamulira awapatse mafuko asanu ndi anai ndi hafu;

¹⁴popeza fuko la ana a Rubeni monga mwa nyumba za makolo ao, ndi fuko la ana a Gadi monga mwa nyumba za makolo ao, adalandira, ndi fuko la hafu la Manase lalandira cholowa chao;

¹⁵mafuko awiriwa ndi hafu adalandira cholowa chao tsidya lija la Yordani ku Yeriko, kum'mawa, kotulukira dzuwa.

¹⁶Ndipo Yehova ananena ndi Mose, nati,

¹⁷Maina a amunawo adzakugawirani dziko likhale cholowa chanu, ndi awa: Eleazara wansembe, ndi Yoswa mwana wa Nuni.

¹⁸Muwatengenso akalonga, kalonga mmodzi ku fuko limodzi, agawe dziko likhale cholowa chao.

¹⁹Maina a amunawo ndiwo: wa fuko la Yuda, Kalebe mwana wa Yefune.

²⁰Wa fuko la ana a Simeoni, Semuele mwana wa Amihudi.

²¹Wa fuko la Benjamini, Elidadi mwana wa Kisiloni.

²²Wa fuko la ana a Dani, kalonga Buki mwana wa Yogili.

²³Wa ana a Yosefe; wa fuko la ana a Manase, kalonga Haniyele mwana wa Efodi.

²⁴Wa fuko la ana a Efuremu, kalonga Kemuwele mwana wa Sifutani.

²⁵Wa fuko la ana a Zebuloni, kalonga Elizafani mwana wa Paranaki.

²⁶Wa fuko la ana a Isakara, kalonga Palatiele mwana wa Azani.

²⁷Wa fuko la ana a Asere, kalonga Ahihudi mwana wa Selomi.

²⁸Wa fuko la ana a Nafutali, kalonga Pedahele mwana wa Amihudi.

²⁹Iwo ndiwo amene Yehova analamulira agawire ana a Israele cholowa chao m'dziko la Kanani.