Read Chichewa Buku Lopatulika Bible 2014 MATEYU 22 Bible Online

MATEYU 22 - Chichewa Buku Lopatulika Bible 2014 bible

MATEYU 22

¹Ndipo Yesu anayankha, nalankhulanso kwa iwo m'mafanizo, nati,

²Ufumu wa Kumwamba ufanafana ndi munthu, mfumu, amene anakonzera mwana wake phwando la ukwati,

³natumiza akapolo ake kukaitana oitanidwa kuukwati umene; ndipo iwo sanafune kudza.

⁴Pomwepo anatumizanso akapolo ena, nanena, Uzani oitanidwawo, Onani, ndakonza phwando langa; ng'ombe zanga, ndi zonona ndinazipha, ndi zinthu zonse zapsa: idzani kuukwati.

⁵Koma iwo ananyalanyaza, nachoka, wina kumunda wake, wina kumalonda ake:

⁶ndipo otsala anagwira akapolo ake, nawachitira chipongwe, nawapha.

⁷Koma mfumu inakwiya; nituma asilikali ake napululutsa ambanda aja, nitentha mudzi wao.

⁸Pomwepo inanena kwa akapolo ake, Za ukwati tsopano zapsa, koma oitanidwawo sanayenera.

⁹Chifukwa chake pitani inu kumphambano za njira, ndipo amene aliyense mukampeze, itanani kuukwatiku.

¹⁰Ndipo akapolo ao anatulukira kunjira, nasonkhanitsa onse amene anawapeza, ngakhale oipa, ngakhale abwino; ndipo ukwatiwo unadzala ndi okhala pachakudya.

¹¹Koma mfumuyo m'mene inadza kuwaona akudyawo, anapenya momwemo munthu wosavala chovala cha ukwati;

¹²nanena kwa iye, Mnzangawe, unalowa muno bwanji wosakhala nacho chovala cha ukwati? Ndipo iye analibe mau.

¹³Pomwepo mfumu inati kwa atumiki, Mumange iye manja ndi miyendo, mumponye kumdima wakunja; komweko kudzali kulira ndi kukukuta mano.

¹⁴Pakuti oitanidwa ndiwo ambiri, koma osankhidwa ndiwo owerengeka.

¹⁵Pomwepo Afarisi anamuka, nakhala upo wakumkola Iye m'kulankhula kwake.

¹⁶Ndipo anatumiza kwa Iye ophunzira ao, pamodzi ndi Aherode, amene ananena, Mphunzitsi, tidziwa kuti muli woona, ndipo muphunzitsa njira ya Mulungu moona ndithu, ndipo simusamala munthu aliyense; pakuti simuyang'anira pa nkhope ya anthu.

¹⁷Chifukwa chake mutiuze ife, muganiza chiyani? Kuloledwa kodi kupatsa msonkho kwa Kaisara, kapena iai?

¹⁸Koma Yesu anadziwa kuipa kwao, nati, Mundiyeseranji Ine, onyenga inu?

¹⁹Tandionetsani Ine ndalama yamsonkho. Ndipo iwo anadza nalo kwa Iye rupiya latheka.

²⁰Ndipo Iye anati kwa iwo, Ncha yani chithunzithunzi ichi, ndi kulemba kwake?

²¹Nanena iwo, Cha Kaisara. Pomwepo Iye anati kwa iwo, Chifukwa chake patsani kwa Kaisara zake za Kaisara, ndi kwa Mulungu zake za Mulungu.

²²Ndipo pamene iwo anamva, anazizwa, namsiya Iye, nachokapo.

²³Tsiku lomwelo anadza kwa Iye Asaduki, amene amanena kuti palibe kuuka kwa akufa; namfunsa Iye,

²⁴nanena, Mphunzitsi, Mose anati, Ngati munthu akafa wopanda mwana, mphwake adzakwatira mkazi wake, nadzamuukitsira mbale wake mbeu.

²⁵Tsono panali ndi ife abale asanu ndi awiri; ndipo wakuyamba anakwatira, namwalira wopanda mbeu, nasiyira mphwake mkazi wake;

²⁶chimodzimodzi wachiwiri, ndi wachitatu, kufikira wachisanu ndi chiwiri.

²⁷Ndipo pomalizira anamwaliranso mkaziyo.

²⁸Chifukwa chake m'kuuka kwa akufa, iye adzakhala mkazi wa yani wa asanu ndi awiriwo? Pakuti onse anakhala naye.

²⁹Koma Yesu anayankha, nati kwa iwo, Mungolakwa osadziwa malembo, kapena mphamvu za Mulungu.

³⁰Pakuti m'kuuka kwa akufa sakwatira, kapena kukwatiwa, koma akhala ngati angelo a Kumwamba.

³¹Koma za kuuka kwa akufa, simunawerenga kodi chomwe chinanenedwa kwa inu ndi Mulungu, kuti,

³²Ine ndili Mulungu wa Abrahamu, ndi Mulungu wa Isaki, ndi Mulungu wa Yakobo? Sali Mulungu wa akufa koma wa amoyo.

³³Ndipo pamene makamu a anthu anamva, anazizwa ndi chiphunzitso chake.

³⁴Koma Afarisi, pakumva kuti Iye anatontholetsa Asaduki, anasonkhana.

³⁵Ndipo mmodzi wa iwo, mphunzitsi wa chilamulo, anamfunsa ndi kumuyesa Iye, nati,

³⁶Mphunzitsi, lamulo lalikulu ndi liti la m'chilamulo?

³⁷Ndipo Yesu anati kwa iye, Uzikonda Ambuye Mulungu wako ndi mtima wako wonse, ndi moyo wako wonse, ndi nzeru zako zonse.

³⁸Ili ndilo lamulo lalikulu ndi loyamba.

³⁹Ndipo lachiwiri lolingana nalo ndili, Uzikonda mnzako monga udzikonda iwe mwini.

⁴⁰Pa malamulo awa awiri mpokolowekapo chilamulo chonse ndi aneneri.

⁴¹Ndipo pamene Afarisi anasonkhana, Yesu anawafunsa,

⁴²nati, Muganiza bwanji za Khristu? Ali mwana wa yani? Iwo ananena kwa Iye, Wa Davide.

⁴³Iye anati kwa iwo, Ndipo Davide mu Mzimu amtchula Iye bwanji Ambuye, nanena,

⁴⁴Ambuye ananena kwa Ambuye wanga, ukhale pa dzanja lamanja langa, kufikira Ine ndidzaika adani ako pansi pa mapazi ako.

⁴⁵Chifukwa chake ngati Davide amtchula Iye Ambuye, ali mwana wake bwanji? Ndipo panalibe mmodzi anatha kumyankha mau.

⁴⁶Ndipo sanalimbike mtima munthu aliyense kumfunsa kanthu kuyambira tsiku lomwelo.